Elordada qazaq halqynyń maqtanyshyna aınalǵan ult tulǵalaryna biregeı eskertkish memorıal kesheni turǵyzylsa ıgi - I. Elekeev
ASTANA. Aqpannyń 3-i. QazAqparat /Qanat Mámetqazyuly/ ‑ Elordada qazaq halqynyń maqtanyshyna aınalǵan ult tulǵalaryna biregeı eskertkish memorıal kesheni turǵyzylsa ıgi. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Irak Elekeev osylaı málim etti,
dep habarlaıdy QazAqparat.
«Astanany kóshirý ıdeıasynyń avtory, elordanyń bas sáýletshisi N. Nazarbaev, birneshe ret «Astana - elimizdiń aınasy, Qazaqstannyń maqtanyshy» dep atap ótken bolatyn. Sondyqtan da búgingi kúni Vankýverden Vladıvostokqa deıin aty áıgili bolyp otyrǵan Astanada ulttyq sımvoldar aıqyn kórinis tabýy shart. Bul rette, eń aldymen aıbyndy Alataýdan qart Kaspııge deıingi keńistikti mura etken uly babalarymyzdyń esimderi - Qarasaı, Naýryzbaı, Raıymbek, Syrym Datuly, Isataı, Mahambet babalarymyzdyń attary ulyqtalýy tıis. Endeshe osylar sekildi basqa da qazaq arasyndaǵy ataqty babalarǵa elordadan biregeı memoraıldyq keshen turǵyzǵan oryndy», dedi depýtat.
Onyń aıtýynsha, elordada tek qazaqstandyqtar ǵana emes, basqa halyqtardyń da maqtanyshyna aınalǵan, taǵdyrdyń tálkegimen qazaq dalasyn meken etip, osy jerde ataqtary shyqqan basqa da azamattarǵa qurmet kórsetilýi tıis. Budan basqa, Astanadan halqymyzdyń ańyzǵa aınalǵan tulǵasy Mustafa Shoqaı da óz ornyn alýy kerek, «Alash ordanyń» kórnekti tulǵalaryna da eskertkishter kesheni qoıylýy shart», dedi I. Elekeev.
Sonymen birge, depýtat Qazaqstannyń jańa astanasynda halyq jazýshysy, ult patrıoty Safýan Shaımerdenovtyń esimin qalanyń ortalyq kósheleriniń birine berýdi, sol sekildi qaıratker Qarataı Turysov pen Shárip Omarovty da umytpaý qajettigin, Tynyshbaev, Marǵulan, Bekmahanovtardyń eńbegi baǵalanýy tıistigin atap ótti. «Tipti, nege sol jaǵalaýdaǵy kóshelerdiń birine táýelsizdigimizdiń ornyǵýyna járdemshi bolǵan RF alǵashqy prezıdenti B. Eltsınniń esimin bermeımiz?! Qazaqstannyń shynaıy patrıoty, burynǵy Joǵarǵy keńes depýtaty A. Knıagınınniń atymen astananyń bir kóshesi atalsa nesi aıyp?», dedi ol.
Osyǵan baılanysty depýtat, elordanyń kóshe ataýlarymen, eskertkish ornatý máselelerimen tek ákimdik janyndaǵy onomastıka komıssııasy aınalysatynyna túsinbeýshilik bildirip ótti. «Bundaı óte jaýapkershilikti sharýany bir ǵana qala ákimdiginiń moınyna júktep qoıýǵa bolmaıdy. Sondyqtan da, Úkimet janynan bul sharamen aınalysatyn memlekettik komıssııa qurý qajet dep bilemin», dedi I. Elekeev.
