Elordada qaıyrymdylyq velosherý ótedi

NUR-SULTAN. QazAqparat - Elordada 10 tamyzda saǵat 19:30-da «Saý júrek aılyǵy» jylsaıynǵy qaıyrymdylyq velosherýi ótedi, dep habarlaıdy QazAqparat qala ákimdiginiń mádenıet jáne sport basqarmasyna silteme jasap.

Qazaqstanda donorlyq júrekti birinshi ret transplantatsııalaýdyń jeti jyldyǵyna arnalǵan shara aıasynda qaıyrymdylyq velosherýi men MOLDANAZAR tobynyń kontserti uıymdastyrylady.

Sherýge qatysýshylar Kereı-Jánibek handar kóshesimen jáne Turan dańǵylymen júrip ótedi. Uzyndyǵy 12 shaqyrymdy quraıtyn marshrýt Ulttyq ǵylymı kardıohırýrgııa ortalyǵynyń turaǵynan (Turan dańǵ., 38) bastalyp, Turan dańǵylymen «Astana juldyzdary» monýmentine deıin (Qabanbaı batyr dańǵylyndaǵy aınalma jol) jalǵasady. Qatysýshylar osy jerden keri burylyp, Turan dańǵylymen Ulttyq ǵylymı kardıohırýrgııa ortalyǵyna deıin júredi. Márede baǵaly syılyqtar utysy uıymdastyrylady, al jınalǵan qarjy kardıohırýrgııa salasyndaǵy bilim men ǵylymdy damytýǵa baǵyttalady. Qatysýshylardyń qaýipsizdigin qamtamasyz etý maqsatynda velosherý barysynda atalǵan kóshelerde kólik qozǵalysy jartylaı shekteledi.

Aıta keteıik, qashyqtyqty baǵyndyrýǵa 60 mınýt ýaqyt beriledi.

Velosherýge 16 jastan asqandardyń barlyǵy qatysa alady, ol úshin «Júrek ortalyǵy» korporatıvtik qorynyń saıtynda tirkelý kerek. Tirkelý quny – 5 myń tg. Birinshi bolyp tirkelgen 300 qatysýshyǵa qordyń fırmalyq belgisi bar zat syılyq retinde beriledi.

Sharaǵa donorlyq júrek salynǵan patsıentter men osy biregeı operatsııalardy jasaǵan dáriger ıÝrıı Pıa bastaǵan mamandar da atsalysady.

«Saý júrek aılyǵy» qaıyrymdylyq sharasynyń basty uıymdastyrýshysy «Ulttyq ǵylymı kardıohırýrgııa ortalyǵy» AQ bastamasymen qurylǵan «Júrek ortalyǵy» korporatıvtik qory.

«Júrek ortalyǵy» qory – klınıkada ǵylymı jáne bilim berý qyzmetin damytý jáne jalpy, Qazaqstan boıynsha kardıohırýrgııalyq qyzmetti jetildirý maqsatynda qurylǵan elimizdegi osyndaı alǵashqy jáne jalǵyz qor.