Elordada qaıtarylyp alynǵan jeti jer telimi aýktsıonda 1,5 mlrd teńgege satyldy

NUR-SULTAN. QazAqparat – Elordada paıdalanylmaǵan jer ýchaskeleri sot sheshimimen memleketke qaıtarylyp, saýda-sattyqqa shyǵaryldy. Jeti jer telimi 1,5 mlrd teńgege satyldy, dep habarlaıdy QazAqparat qala ákimdigine silteme jasap.

Qalalyq Ádilet departamentiniń Múliktik emes sıpattaǵy talaptardy oryndaý bóliminde jyl basynan beri maqsatty paıdalanylmaǵan jer ýchaskelerin alý boıynsha 18 atqarýshylyq is júrgizilgen.

«Osyǵan baılanysty sot sheshimi boıynsha májbúrlep alynǵan, sol sııaqty maqsatty paıdalanylmaǵan 7 jer ýchaskesi bólimniń sot oryndaýshysymen saýda-sattyqqa shyǵarylyp, jalpy somasy 1,5 mlrd teńgeden astam somaǵa satyldy», delingen habarlamada.

Ádilet departamenti qazirgi ýaqytta 10 atqarýshylyq is júrgizýdi aıaqtady (7-eýi tolyq kólemde oryndaldy, 3-eýi sot sheshiminiń kúshin joıýǵa baılanysty toqtatyldy). Memleketke qaıtarylǵan jer ýchaskesiniń bireýi saýda-sattyqqa shyǵaryldy, 7 atqarýshylyq is júrgizilip jatyr.