Elordada qaıtarylǵan aktıvter esebinen salynyp jatqan stadıon qurylysy qashan aıaqtalady
ASTANA. KAZINFORM — Astanada qaıtarylǵan aktıvter esebinen Q.Muńaıtpasov atyndaǵy jańa zamanaýı stadıonynyń qurylysy júrgizilip jatyr, dep habarlaıdy Astana qalasy prokýratýrasy.
Vedomstvo málimetine sáıkes, bul áleýmettik nysandy 2026 jyldyń ekinshi toqsanynda paıdalanýǵa berý josparlanǵan. Qurylys aıaqtalǵannan keıin stadıon aýmaǵynda fýtboldy damytýǵa basymdyq beretin mamandandyrylǵan balalar-jasóspirimder olımpıadalyq rezerv sport mektebi ornalastyrylady.
— Mektep 8 ben 18 jas aralyǵyndaǵy 750 balaǵa eseptelgen. Jas sportshylarǵa jattyǵý jáne jarys protsesine qajetti barlyq jaǵdaılar jasalady: jasandy jabyny bar zamanaýı fýtbol alańy, kıim aýystyratyn bólmeler, jattyqtyrýshylar bólmesi, medıtsına kabıneti jáne kórermenderge arnalǵan trıbýnalar qarastyrylady. Atalǵan nysan sporttyq daıarlyq sapasyn arttyrýǵa, jastar arasynda buqaralyq sportty damytýǵa jáne bolashaq kásibı fýtbolshylardy tárbıeleýge baǵyttalǵan. Halyqtyń ál-aýqatyn arttyrýǵa baǵyttalǵan áleýmettik jobalardyń júzege asyrylýy prokýratýra organdarynyń erekshe baqylaýynda, — dep atap ótti qalalyq prokýratýra.
Budan buryn Atyraýda 1950 jyly paıdalanýǵa berilgen stadıon taǵy rekonstrýktsııadan ótetini málim boldy.