Elordada qaı sport túrleri tanymal
ASTANA. QazAqparat – Elorda turǵyndarynyń 40 paıyzǵa jýyǵy sportpen shuǵyldanyp júr. Bul týraly qalalyq Dene shynyqtyrý jáne sport basqarmasynyń basshysy Samat Jylqybaev aıtty, dep habarlaıdy QazAqparat tilshisi.
«Astana turǵyndarynyń 37,26 paıyzy dene shynyqtyrýmen jáne sportpen únemi aınalysady. Jyl basynan 311 buqaralyq sport sharasy ótkizilip, oǵan qalanyń 26 myń turǵyny men qonaǵy qatysty. Sportpen shuǵyldanatyn azamattardy qamtýdy ulǵaıtý maqsatynda buqaralyq sportty damytý basymdyǵyn eskere otyryp, arnaıy baǵdarlamalar men jobalar ázirlendi. Osy baǵdarlamalar aıasynda elordada fýtbol, strıtboldan aýla lıgalary uıymdastyryldy», - dedi basqarmanyń basshysy.
Aıtýynsha, qalada komandalyq sport túrleri keńinen tanymal.
«Osy oraıda turǵyndar basketbol, voleıbol, fýtbol, shaıbaly hokkeı sııaqty oıyndarǵa kóp barady. Sonymen qatar qazir júgirý, dzıýdo, boks, júzý jáne velosportqa adamdar erekshe mán berip otyr. Qysqy olımpıadalyq sport túrlerinde shaıbaly hokkeımen aınalysatyn kontıngent basqa sport túrlerine qaraǵanda basym», - dedi basqarma basshysy.
Sonymen birge short-trek, shańǵy jarysy, konkımen júgirý sııaqty sport túrlerine suranys bar.
«Buǵan damyǵan sport qurylymdary yqpal etip jatyr. Qalada olımpıadalyq sport túrlerimen aınalysatyndardyń jalpy sany 142 725 adamdy qurady. Karate, djıý-djıtsý, shahmat jáne pankratıon da olımpıadalyq emes sport túrleriniń arasynda tanymal bolyp qala beredi. Olımpıadalyq emes sport túrlerimen jalpy 341 103 adam aınalysyp júr. Eń tanymal ulttyq sport túri – toǵyzqumalaq. Qalada ulttyq sport túrimen 11 128 adam aınalysyp jatyr», - dedi Samat Jylqybaev.
Budan buryn habarlanǵandaı, Astana sportshylary jyl basynan 4 myńnan astam medal jeńip alǵan.
Sondaı-aq Samat Jylqybaev jyl saıyn tamyzdyń úshinshi jeksenbisinde atalyp ótetin Sport kúnine oraı Astanada qandaı sharalar uıymdastyrylatynyn aıtty.
