Elordada qaı pánniń muǵalimderi jetispeıdi
NUR-SULTAN. QazAqparat – Nur-Sultan bilim basqarmasynyń basshysy Sholpan Qadyrova elordaǵa qandaı muǵalimder jetispeıtinin aıtyp berdi, dep habarlaıdy QazAqparat tilshisi.
«Oqý jylynyń sońynda pedagogıkalyq kadrlarǵa degen qajettilik - 842 adamdy qurady. 706 zeınetker ustaz ben jańa mektepterdiń ashylýyn qosqanda, 2000-nan astam qyzmetker jetispeıdi. Qalada negizinen orys tilinde sabaq beretin bastaýysh synyp muǵalimderi, sonymen qatar orys tili men ádebıeti, matematıka, ınformatıka, aǵylshyn tili pániniń ustazdary qajet. Odan bólek, defektolog, logoped sekildi mamandar, balabaqsha tárbıeshileri tapshy bolyp otyr», - dedi Sholpan Qadyrova qala ákimdiginiń Facebook paraqshasynda ótken baspasóz máslıhatynda.
Basqarma basshysynyń aıtýynsha, bilim berý uıymdaryn kadrmen qamtamasyz etý boıynsha jol kartasy jasalyp, bekitildi. Onyń aıasynda respýblıkadaǵy JOO-larmen jáne kolledjdermen jumys júrgiziledi.
«Elordaǵa pedagog tartý úshin ýnıversıtet túlekterimen onlaın-kezdesý ótkizý jumysy jalǵasýda. Elordalyq mektep basshylary, balabaqsha meńgerýshileri onlaın eńbek jármeńkelerine qatysty (L.Gýmılev atyndaǵy Eýrazııa ulttyq ýnıversıteti, A.Baıtursynov atyndaǵy Qostanaı memlekettik ýnıversıteti ótkizgen jármeńke - red). Olar enbek.kz portalynda úmitkerlerdi (sonyń ishinde aımaqtarda jumys isteıtin muǵalimderdi) qarastyrýda. Búgingi tańda 300-ge jýyq túıindeme zerttelip jatyr», - dedi ol.
