Elordada qaı oryndarda shomylýǵa ruqsat etiledi
ASTANA. KAZINFORM — Elordada shomylý maýsymynyń bastalýyna baılanysty sý aıdyndaryndaǵy qaýipsizdik sharalary kúsheıtildi. Bul jóninde qalalyq Tótenshe jaǵdaılar departamenti málimdedi.
— Jaz mezgiliniń kelýimen Astana turǵyndary men qala qonaqtary sý jaǵasyna jıi bara bastady. Osyǵan baılanysty qalalyq Tótenshe jaǵdaılar departamenti sýdaǵy qaýipsizdikti qamtamasyz etýge baǵyttalǵan profılaktıkalyq jáne jedel is-sharalardy kúsheıtti.
Qazirgi ýaqytta qutqarýshylar Esil ózeninde kún saıyn baqylaý jumystaryn júrgizýde. Sonymen qatar qaýipti aımaqtarda úsh mobıldi qutqarý beketi jumys istep tur, — delingen habarlamada.
Vedomstvo málimetinshe, azamattardyń qaýipsizdigin qamtamasyz etý maqsatynda shomylý úshin bes resmı oryn belgilengen. Myna jerlerde ǵana sýǵa túsýge ruqsat etiledi: Ortalyq qalalyq jaǵajaı, kommýnaldyq jaǵajaı, sondaı-aq «Armına», «Stolıchnyı dvor» jáne «Trı peskarıa» demalys aımaqtary. Al jabdyqtalmaǵan jáne qaýipti ýchaskelerde shomylýǵa tyıym salynǵany týraly arnaıy eskertý belgiler ornatylǵan.
Sondaı-aq, mamandar qala turǵyndary men qonaqtaryn tek resmı jaǵajaılarda demalýǵa, balalardy qaraýsyz qaldyrmaýǵa jáne mas kúıinde sýǵa túspeýge shaqyrady.
Qaýipsizdik talaptaryn buzǵandarǵa ákimshilik jaýapkershilik qarastyrylǵan. Ótken jylǵy shomylý maýsymynda júrgizilgen reıdter barysynda 176 ákimshilik hattama toltyrylǵan.
Ókinishke qaraı, byltyr elordadaǵy sý aıdyndarynda úsh adam sýǵa ketti. Olardyń ekeýi kámeletke tolmaǵan balalar. Mamandardyń aıtýynsha, barlyq qaıǵyly jaǵdaı shomylýǵa ruqsat etilmegen oryndarda tirkelgen.
Qutqarýshylar jazǵy demalys kezinde qarapaıym qaýipsizdik erejelerin saqtaý adam ómirin saqtap qalýdyń basty kepili ekenin eskertedi.
Aıta keteıik, buǵan deıin ІІM shomylý maýsymynda qaýipsizdik talaptaryn qatań saqtaýǵa shaqyrǵanyn jazǵanbyz.
Kamıla Taıtóleý
