Elordada qaýipti turǵyn úı keshenderiniń sany azaıyp keledi
NUR-SULTAN. QazAqparat - Elordada kóktemniń basynan bastap qaýipti turǵyn úılerdi jóndeý boıynsha aýqymdy jumystar bastaldy. TKSh baǵdarlamasy boıynsha jóndelgen kóp páterli turǵyn úı keshenderiniń jalpy sany 2020 jyly 50-den asady, sondaı-aq 100-ge jýyq lıft jóndelip, aýystyrylady, dep habarlaıdy QazAqparat qala ákimdiginiń resmı saıtyna silteme jasap.
«Elordada qaýipti turǵyn úı keshenderin jóndeý boıynsha jumystar júrgizemiz. Bul qulap jatqan plıtalar, janǵysh tósemder, apatty jaǵdaıdaǵy jedelsatylary bar úıler. Mysaly, «Terrıtorııa komforta – 2» kóppáterli turǵyn úı kesheni bárine belgili. Turǵyndar kezdesýler barysynda úıde turýdan úreılenetinin aıtqan. Olar jeldi kúni balalaryn dalaǵa shyǵarýǵa qorqady eken. Buǵan sebep - úıdi qaptap turǵan plıtalardyń jıi qulaýy.
Bul kóppáterli turǵyn úı kesheninde aýqymdy jumystar júrgizildi: qasbeti tolyq aýystyryldy, keramogranıt plıtalar alynyp tastaldy, jylytqyshtar, qabataralyq, órt jaǵdaıyna arnalǵan esikter jáne taǵy basqalary aýystyryldy. Buryn úı paıdalanýǵa berilmegen edi, TK-nyń mekenjaıy bolmady. Turǵyndar páterlerinde tirkele almady, ıaǵnı ózderi turatyn aýdannyń áleýmettik nysandarynyń qyzmetterin paıdalana almady.
Al endi bul máseleler sheshildi. Búkil qujattamany daıyndap, TK-ny paıdalanýǵa berdik. Endi úıdiń óz resmı mekenjaıy bar. Mamandar páter ıelerine tehnıkalyq pasport berý úshin páterler aýmaqtaryn ólsheýge kiristi», - dedi elorda ákimi Altaı Kólginov.
Qala basshysymen kezdesý barysynda TK turǵyndary balalaryn kóshege shyǵarýdan qoryqqanyn, plıtalar qulap ketedi degen qaýippen ózderi úıdiń jan-jaǵyn, tóbesin qaraılap júretinin atap ótti.
«Plıtalar jel tursa qulaıtyn. Olar tez janatyn edi, sondyqtan órt shyǵa ma degen qorqynysh boldy. Kóp tanys adamdar bizge úı tipti qulap ketýi múmkin dedi. Turǵyn úı kesheniniń ózi birneshe jyl buryn qaýipti dep tanylǵan. Endi úı ózgerdi. Bizdiń úı de jáne aýla da qaýipsiz. Jaqynda biz óz páterimizge tehnıkalyq pasport alamyz. Kórsetilgen kómek úshin Prezıdentke, memleketke alǵysymyzdy bildiremiz», - dep atap ótti turǵyndar.
Sonymen qatar, Nur-Sultanda apatty jaǵdaıdaǵy úılerdi buzý jumystary júrgizilýde. 2019 jyly 200-ge jýyq otbasy jańa turǵyn úıge kóshirildi, bıyl 200-den astam otbasyn kóshirý josparlanýda.
