Elordada qaýipti turǵyn úı keshenderi jóndele bastady
NUR-SULTAN. QazAqparat – Elordada qaýipti turǵyn úı keshenderi jóndele bastady, dep habarlaıdy QazAqparat qala ákimdigine silteme jasap.
Turǵyn-úı kommýnaldyq sharýashylyǵyn jańǵyrtý baǵdarlamasy boıynsha bıyl qalada 50-den astam kóppáterli turǵyn úı kesheni, 100-den asa jedelsaty jóndeledi jáne jańasyna aýystyrylady. Budan bólek, 2020 jyly 800 otbasy apattyq eski úıden jańa páterge kóshiriledi.
Buǵan deıin elorda ákimi Altaı Kólginov «Orbıta» jáne «Terrıtorııa komforta» túrǵyn úı keshenderi turǵyndarymen kezdesýinde úılerdi jóndeýge qatysty másele kóterilgen bolatyn. Atalǵan turǵyn úı keshenderin jóndeý bastaldy.
Turǵyndar jel tursa dalaǵa shyǵýǵa qorqatynyn aıtqan.
«Balalardyń basyna plıtka qulap ketedi dep qaýiptenip, dalaǵa shyǵarmaımyz. Sondaı-aq órt qaýipsizdigi júıesi de joq, qorqyp ómir súrip jatyrmyz. Ózimizdiń úıde «plıtka qulap ketedi» dep qaýiptenbeı júrgimiz keledi», degen bolatyn turǵyndar.
«Bıyl aýqymdy jumys atqarylady, turǵyn úı kesheni qaptamasy turǵyndarǵa qaýip tóndirmeýi tıis. «Orbıta» jáne «Terrıtorııa komforta» turǵyn úı keshenderiniń salynǵanyna kóp bolmasa da, jel turǵan saıyn plıtkasy qulaıdy, vıtrajdary durys ornatylmaǵan jáne t.b. Qazir jóndeý bastaldy. Qaptamasyn aýystyryp, vıtrajdardy qaıta montajdaımyz, sondaı-aq órt qaýipsizdigi júıesi men jylytý júıesin jóndep, basqa da máselelerdi sheshetin bolamyz», – dedi qala ákimi Altaı Kólginov.
Eske sala ketsek, byltyr qarasha aıynda «Orbıta» turǵyn úı kesheninde balkony ornynan «jyljyp», eden dirildegen. Osy máselege túsinik bergen qalalyq orta sapasy jáne baqylaý basqarmasy basshysynyń orynbasary Dáýlet Dosqulov turǵyn úı kesheni problemalyq nysan ekenin moıyndap, ákimdiktiń úleskerler máselesin sheshý boıynsha sharalar jospary bar ekenin jetkizgen. Onyń aıasynda úıdiń konstrýktsııasyny nyǵaıtý, qasbetin aýystyrý jáne resmı túrde paıdalanýǵa berý kózdelgen.
