Elordada qaýipsizdigi tómen kolonııada jazasyn óteýshiler 100% jumyspen qamtylǵan
Bul týraly atalǵan mekemeniń sottalǵandardy eńbekpen qamtýdy uıymdastyrý bóliminiń basshysy, ádilet maıory Aıgúl Daýytova málim etti, dep habarlaıdy QazAqparat tilshisi.
«QR Qylmystyq-atqarý kodeksiniń 119 babyna saı sottalǵandardy eńbekpen qamtý máselesi qarastyrylǵan. Oǵan sáıkes biz olardy jumyspen qamtımyz. Sottalǵandarǵa jumysty memlekettik jáne jeke mekemeler usynady. ıAǵnı keıbiriniń jumysy qala ishinde bolsa, keıbiri ónerkásiptik aımaqta eńbektenip jatyr. Qazirgi ýaqytta bizdiń mekemede 297 sottalǵan azamat jazasyn ótep jatyr jáne osy atalǵan barlyq azamattar jumyspen qamtylǵan. Olardyń arasynda aýla tazalaýshy, aspaz, avtomehanık, tiginshi, eden jýýshy, baǵban sekildi mamandar bar. Sondaı-aq, ónerkásip aımaǵynda jol júrý erejesi belgilerin jasap shyǵaratyn JShS jumys istep tur. Odan bólek, arnaıy kıimder shyǵaratyn tigin tsehy men tehnıkalyq baıqaý stantsııasy (STO) jumys isteıdi», - dedi Aıgúl Daýytova.
Onyń aıtýynsha, sottalǵan azamattardyń jumysqa yntasy joǵary.
«Otbasyly jandar jumys istep úı ishine kómekteskisi keledi. Keıbiriniń nesıesi bar, ony tóleý kerek. Jalpy eńbektenem degen janǵa bizde jumys tabylady. Sol sııaqty birqatar jumys oryndary qalanyń ishinde ornalasqan. Kúndelikti tańerteń jumys berýshi alyp ketip, keshke alyp keledi. Árıne, óz tarapymyzdan jumysshylardy qadaǵalap, tekserip turamyz. Sondaı-aq, bizge kelip jumysshy izdep jatqan mekemelerdiń qatary kóp. Deni qurylys jáne qurylys kompanııalary», - deıdi ol.
Eńbekpen qamtý bólimi basshysynyń aıtýynsha, atalǵan kolonııada negizinen jol-kólik oqıǵasyna kináli jáne urlyq jasaǵandar jazasyn ótep jatyr.
Buǵan deıin atalǵan mekemede jazasyn óteýshiler jylyjaıda qııar ósirip, apta saıyn 100 keli ónim alyp otyrǵany týraly habarlaǵan edik.
