Elordada qaýipsiz tamaqtaný jáne kóńil kóterý oryndarynyń reıtıngi jasalady

ASTANA. QazAqparat – Endigi ýaqytta elorda turǵyndary men qonaqtary dámhana, meıramhana jáne kóńil kóterý oryndarynda qaýipsiz demalý úshin qoǵamdyq orynnyń reıtıngine qarap tańdaı alady. Reıtıng týraly tolyǵyraq Astana qalasy polıtsııa departamenti jergilikti polıtsııa qyzmeti basqarmasynyń bastyǵy Arman Aıtmaǵambetov aıtyp berdi, dep habarlaıdy QazAqparat tilshisi.

«Astanada tamaqtaný jáne kóńil kóterý oryndarynda qaýipsizdikti qamtamasyz etý maqsatynda pılottyq joba qolǵa alyndy. Bıznes qaýymdastyqpen birlesip, qaladaǵy dámhana, meıramhana jáne túngi klýbtardyń qaýipsizdik deńgeıi boıynsha reıtıng jasalady. Qaýipsizdik reıtıngine qoǵamdyq oryndar erikti túrde qatysady, májbúrleý joq. Sondaı-aq, tamaqtaný jáne kóńil kóterý oryndaryn ákimshilik nemese basqa jazaǵa tartý kózdelmeıdi. Bul jerde negizgi maqsat – qala turǵyndary men qonaqtarynyń qaýipsiz demalýyna jáne tamaqtanýyna jaǵdaı jasaý, ıaǵnı qaýipsizdigin qorǵaý. Ózińiz bilesiz, dámhana, túngi klýbtarda buzaqylyq, tóbeles bolyp turady. Demalýshylar qaýipsizdiktiń joqtyǵyn aıtyp shaǵymdanyp jatady», - dedi Arman Aıtmaǵambetov.

Onyń aıtýynsha, atalǵan joba elimizde alǵash júzege asyrylyp jatyr.

«Demek, astanalyqtar dámhana, meıramhanalardyń qaýipsizdik reıtıngine qarap, tynysh jerdi tańdaı alady. Ázirge reıtıng barysymen Smart Astana platformasy arqyly tanysýǵa bolady. Aldaǵy ýaqytta arnaıy servıs ashylady, búginde ol jasalyp jatyr. Qaýipsiz qoǵamdyq oryn degenimiz ne? Aldymen, beınebaqylaý men mamandandyrylǵan kúzettiń bolýy. Sonymen qatar, dabyl batyrmasynyń bolýy abzal. Qoǵamdyq oryn mańynyń jaryqpen qamtylýy jáne órt qaýipsizdigi erejeleriniń saqtalýy mańyzdy. Sol sııaqty tótenshe jaǵdaı týyndaǵanda ǵımarattan shyǵatyn qosymsha esiktiń bolýy mindetti», - deıdi ol.

Búginde elordada 20 tamaqtaný jáne kóńil kóterý orny pılottyq rejımde qaýipsizdik reıtıngine qatysyp jatyr. Aldaǵy ýaqytta qatysýshylar sany arta túspek. Polıtsııa departamenti ókiliniń málimdeýinshe, bıznes ókilderi tarapynan jobaǵa qoldaý bar.

«Bul jerde qoǵamdyq orynnyń ishindegi jaǵdaı ǵana emes, syrtynda ne bolyp jatqany da mańyzdy. Mysaly, dámhanada tóbeles shyqsa, kúzet buzaqylardy dalaǵa qýyp shyǵady, al odan ári jaǵdaı ne bolyp jatyr, ony eshkim bilmeıdi. Osy oraıda, qoǵam qaýipsizdigin qamtamasyz etý óte mańyzdy», - dedi jergilikti polıtsııa qyzmeti basqarmasynyń basshysy.

A. Aıtmaǵambetov keltirgen statıstıkaǵa sáıkes, ótken jyly tamaqtaný jáne kóńil kóterý oryndarynda buzaqylyq jasaýǵa qatysty polıtsııaǵa 16 myń qońyraý túsken. Saldarynan 610 adam jaraqat aldy. Sondaı-aq, byltyr dámhana, meıramhana jáne túngi klýbtarda 700 urlyq deregi tirkelgen.