Elordada qate jazylǵan kóshe jarnamalary tekserilip jatyr
NUR-SULTAN. QazAqparat - Nur-Sultan qalasynda Tilderdi damytý jáne arhıv isi basqarmasynyń qolǵa alýymen «Til tazalyǵy - barshaǵa ortaq is» aktsııasy ótip jatyr, dep habarlaıdy QazAqparat elorda ákimdigine silteme jasap.
«Aktsııanyń negizgi maqsaty - tilderdi qoldaný salasyndaǵy zańnamanyń saqtalýyn qadaǵalaý, zańnamany buzǵandardyń jaýapkershiligin kúsheıtý, memlekettik tildi qoldanýdyń mártebesin ósirý, syrtqy jarnama men kórneki aqparat mátinderinde kezdesetin qatelerdiń aldyn alý», - dedi ákimdikten.
Málim etilgendeı, bıylǵy sáýir-mamyr aılarynda qalanyń 68 kóshesi men 14 dańǵylynda ornalasqan shaǵyn jáne orta bıznes sýbektileriniń jarnama mátinderi tekserildi. Kásip ıelerine zańnama talaptary túsindirilip, kemshilikter túzetildi.
«Ruqsatsyz ornalastyrylǵan 400-den astam jarnama alynyp tastaldy. Uıymdastyrýshylar aktsııanyń aralyq qorytyndysyn «dóńgelek ústel» otyrysynda jarııalaıdy. Oǵan Nur-Sultan qalasy ákimdiginiń basshylyǵy, Qazaqstan Respýblıkasy Mádenıet jáne sport mınıstrliginiń Til saıasaty komıteti, Nur-Sultan qalasynyń prokýratýrasy, qalalyq kásipkerler palatasy, «Almaty», «Baıqońyr», «Esil», «Saryarqa» aýdandarynyń ákimdikteri, Sáýlet, qala qurylysy jáne jer qatynastary, Investıtsııalar jáne kásipkerlikti damytý basqarmalary jáne taǵy basqa memlekettik mekemelerdiń ókilderi, sondaı-aq qoǵam qaıratkerleri men arnaıy shaqyrylǵan dáriskerler qatysady», - delingen aqparatta.
