Elordada kásiptik bilim beretin keıbir kolledjderdi biriktirý josparlanyp otyr
NUR-SULTAN. QazAqparat – Elordada tehnıkalyq jáne kásiptik bilim berý júıesin damytý maqsatynda básekege qabiletti, jańasha oılaıtyn tehnıkalyq jáne kásiptik bilim berý uıymdarynyń kóshbasshylary úshin kadrlyq rezerv qalyptastyrylyp jatyr, dep habarlaıdy QazAqparat ákimdiktiń saıtyna silteme jasap.
Búgingi tańda elordada tehnıkalyq jáne kásiptik bilim berý júıesi boıynsha 35 kolledj bar, onyń 23-i jeke menshik. Onda 77 mamandyq pen 122 biliktilik boıynsha oqytylady. Stýdentterdiń jalpy sany - 25 643, olardyń 13 687-si - memlekettik bilim berý tapsyrysy boıynsha oqıdy.
Qazirgi ýaqytta qalalyq TjKB-nyń sátti damýyna basqarý júıesindegi menedjmenttiń nasharlyǵy, kópsalaly kolledjderdiń basymdyǵy, kásibı dıagnostıkanyń tapshylyǵy men bitirýshilerdiń suranysqa ıe mamandyqtardy tańdaýǵa baǵdarlaýdyń bolmaýy, sondaı-aq materıaldyq-tehnıkalyq bazanyń tómendigi kedergi keltiredi. Elordanyń bilim basqarmasynda atalmysh máseleni sheshý úshin kóshbasshylyq qabiletterimen erekshelenetin jáne TjKB júıesin damytý boıynsha tyń ıdeıasy bar kóshbasshylardyń kadrlyq rezervin qurý usynyldy. Kadrlyq rezervke qatysýshylar tehnıkalyq jáne kásiptik bilim sapasyn jańa deńgeıge kóterýge kómektesedi.
Sonymen qatar, profıldeý aıasynda keıbir kolledjderdi biriktirý josparlanǵan.
«Ekonomıka salalarynda kadrlardy daıarlaýdy júıeleý úshin kolledjde profıldeý jumystary júrgizilýde. Osyǵan baılanysty úsh kolledjdiń (energetıka jáne baılanys kolledji, qurylys jáne tehnıkalyq kolledj, polıtehnıkalyq kolledj), sondaı-aq taǵy ekeýiniń (ekonomıka, tehnologııa jáne tamaq ónimderin óndirýdi standarttaý kolledji, kópsalaly kolledj) birigýi WSK standarttaryna sáıkes kadrlar daıarlaýǵa jáne halyqaralyq alańdarda nátıjege qol jetkizýge múmkindik beredi», - dedi elordalyq bilim departamentiniń TjKB bóliminiń bastyǵy Saltanat Basygaraeva.
