Elordada Kásipodaqtar kúnine oraı Prezıdenttiń «Alǵys haty» tabystaldy

NUR-SULTAN. QazAqparat – Qazaqstan Kásipodaqtary kúni kásibı merekesine oraı birqatar sala qaıratkerine QR Prezıdenti Qasym-Jomart Toqaevtyń «Alǵys haty» berildi. Memleket basshysynyń atynan marapatty QR Memlekettik hatshysy Qyrymbek Kósherbaev tapsyrdy, dep habarlaıdy QazAqparat tilshisi.

«Kúlli jalpaq álem bostandyqty tý etken ádilettilikti, jarastyqty ańsaıdy. Endeshe, adamdar men qoǵamdardyń, memleketter men halyqtardyń óz erki ózindegi Táýelsizdigi eshkim til tıgize almaıtyn qasıetti uǵym. Sol Táýelsizdikke janashyr, áleýmettik turaqtylyqqa janashyr, ádilettilikke janashyr, eńbek adamyna janashyr - Sizder, ıaǵnı qadirli kásipodaq qozǵalysynyń qaıratkerleri. Árıne, kópten kútken maqsat pen armandy bir kúnde júzege asyrý qıyn bolar. Bir kúnde baıyp, barsha muratqa da jetý múmkin bola qoımas. Ótpeli kezeńdegi ǵalam men qoǵamda qıyndyq pen qııanattyń da bar bolatyny ras», - dedi Qyrymbek Kósherbaev elordadaǵy Kásipodaqtar kúnine arnalǵan saltanatty sharada.

Memlekettik hatshy túrli salalardaǵy naǵyz básekelestikke saı qadamdar jasaý kerektigin, sondaı-aq árkim, ár eńbek ujymy óz pikiri men óz áreketiniń tizginin ózi qolǵa alyp, naqty iske kirise almaı jatqanyn atap ótti. Sonymen qatar, alǵa qoıylǵan bastamalardyń oryndalýyna Táýelsizdik, bıliktegi úndestik, sondaı-aq Prezıdenttiń ádilettilik pen progress úshin atqaryp jatqan qyrýar qyzmeti kepil ekeni aıtyldy.

Q. Kósherbaev qazirgi ýaqyt jeke shaýyp, báıge alatyn zaman emestigin tilge tıek etip, ult bolyp uıysyp, upaıymyzdy túgendeıtin kezeń bolyp otyrǵandyǵyna erekshe nazar aýdardy. Osy oraıda kásipodaq qaıratkerleri istegen isterimen, ádilettilikterimen jaǵymdy ekenin jetkizdi.

«Prezıdent Qasym-Jomart Kemeluly sizderdi marapattaı otyra, úlken úmit artady, eldiń birligin amanat etedi, isterińizge sáttilik, otbasylaryńyzǵa amandyq tileıdi», - dedi Memlekettik hatshy.

Sonymen, Prezıdenttiń «Alǵys haty» «Qaraǵandy oblysy aýyl sharýashylyǵy, qaıta óńdeý uıymdary jáne memlekettik mekemeler qyzmetkerleriniń jergilikti kásipodaǵy» Jańaarqa aýdany ókildiginiń tóraǵasy Nurlan Aqyshevqa tabystaldy. Budan bólek, osyndaı marapat «Astana-Teplotranzıt» AQ óndiristik-jóndeý qyzmetiniń oqshaýlaý ýchaskesiniń montajshysy Jahmash Omarbekke jáne Qyzylorda oblysyndaǵy Áıteke bı kentindegi Y. Altynsarın atyndaǵy №204 mekteptiń qazaq tili muǵalimi Roza Jumaǵazıevaǵa berildi.