Elordada kásipkerlik sýbektilerdiń quqyqtaryn buzý faktilerine áli de jol berilip otyr - Prokýratýra
ASTANA. 18 shilde. QazAqparat /Qanat Mámetqazyuly/ - Elorda prokýratýra organdary 2011 jyldyń 1-jartyjyldyǵynda kásipkerlik sýbektilerdiń quqyqtaryn qorǵaýǵa baǵyttalǵan zańnamany saqtaý turǵysynda 18 tekserý júrgizip, nátıjesinde 67 zań buzýshylyq anyqtady.
Qadaǵalaý aktileri boıynsha ákimshilik jaýapkershilikke 20 laýazymdy adam, tártiptik jaýapkershilikke 25 adam tartyldy, memleket kirisine 450 myń teńge óndirildi. Bul týraly QR Bas prokýratýrasynyń baspasóz qyzmetinen habarlady.
«Ókinishke qaraı, qabyldanyp jatqan sharalarǵa, sonymen qatar zańnamalyq deńgeıdegi ózgeristerge qaramastan, kásipkerlik sýbektilerdiń quqyqtaryn buzý faktilerine áli de jol berilýde. Mysaly, Astana qalasy Saryarqa aýdanynyń ІІB ýchaskelik ınspektorlary tarapynan kásipkerlerdi zańsyz tekserýdiń 5 deregi anyqtaldy. Astana qalasynyń jeke kásipkeriniń «QR Aýyl sharýashylyǵy mınıstrliginiń agroóndiristik keshendegi Memlekettik ınspektsııa komıtetiniń Astana qalasy boıynsha aýmaqtyq ınspektsııasy» mekemesi qyzmetkerleriniń zańsyz is-qımyldary týraly ınternet-portaldaǵy habarlama boıynsha tekserý nátıjesinde tekserý nysanyna kirmeıtin málimetterdi teksergeni úshin 2 memlekettik veterınarlyq ınspektorǵa qatysty QR-nyń ákimshilik quqyqbuzýshylyqtar týraly kodeksiniń 153-babynyń 1-bóligi (tekserý júrgizý tártibin buzǵany úshin) boıynsha ákimshilik is qozǵaldy. Osy vedomstvodaǵy tekserý kezinde veterınarlyq-sanıtarlyq qorytyndyny alý jáne aýyl sharýashylyq tehnıkasyna jyl saıynǵy memlekettik tehnıkalyq qaraý júrgizýge baılanysty kásipkerlerge olardyń quqyqtary men zańdy múddelerin iske asyrýǵa kedergi jasaý faktilerin anyqtady», delingen prokýratýra taratqan baspasóz aıǵaǵynda.
Budan bólek, tekserý qorytyndysy boıynsha ınspektsııanyń 8 laýazymdy tulǵasy tártiptik jaýaptylyqqa tartylsa, 2 bólim bastyǵyna «Sybaılas jemqorlyqqa qarsy kúres týraly» Zańyna sáıkes, «qyzmetine tolyq sáıkes emestigi týraly eskertý» jasalǵan. Al Esil aýdany prokýratýrasynyń Astana qalasy boıynsha Memlekettik sanıtarlyq-epıdemııalyq qadaǵalaý komıtetiniń departamentine júrgizgen tekserýi barysynda jekelegen ákimshilik quqyq buzýshylyq faktileri boıynsha sybaılas jemqorlyq quqyq buzýshylyqqa jaǵdaı týǵyzýǵa jol bergendigi anyqtaldy. «Kásipkerlerdiń quqyqtaryn buzý faktilerine jol bermeý maqsatynda, Astana qalasynyń prokýratýrasynda 2009 jyldan bastap mobıldik top qurylyp, áreket jasaýda. «Bıznes tiregi» jobasy aıasynda mobıldik toptyń múmkinshilikteri keńeıtildi (www.pravstat.kz saıtynda kásipkerlerge arnalǵan tekserýler týraly aqparat berilgen, sonymen qatar SMS- habarlama arqyly 1012 nómirine júginý múmkindigi kózdelgen). Budan basqa, qala prokýratýrasynda senim telefony áreket etedi (71-24-36), ol da vedomstvolyq saıtta ornalasqan», delingen bas prokýratýra baspasóz qyzmeti taratqan aqparatta.
