Elordada qarjy pıramıdasyn uıymdastyryp, 300 adamdy aldaǵan áıel ustaldy
NUR-SULTAN. QazAqparat - Elordalyq polıtseıler «Realnye dohody» atty eki qarjy pıramıdasyn uıymdastyrýshylarynyń birin ustady, dep habarlaıdy QazAqparat Nur-Sultan qalasy polıtsııa departamentine silteme jasap.
45 jastaǵy áıelge qatysty qarjy pıramıdasyn uıymdastyrdy degen kúdikpen qylmystyq is qozǵaldy. Ol 2019 jyldyń mamyrynan bastap qarjy pıramıdasyn basqaryp, elorda turǵyndary men elimizdiń basqa óńirleriniń azamattarynan alaıaqtyq jolmen asa iri kólemde aqsha alǵan.
Anyqtalǵandaı, kúdikti WhatsApp messendjerinde «Realnye dohody 1» jáne «Realnye dohody 2» atty eki chat ashyp, salymshylarǵa basqa bıznes jobalarda joǵaltqan aqshasyn qaıtarýǵa ýáde etken. Adamdar 20 myń jáne odan da kóp kólemde aqsha salyp, 15 kúnniń ishinde tabysyn 100% qaıtaryp alýǵa úmittengen.
Qazirgi ýaqytta polıtsııaǵa 40-tan astam zardap shekken salymshy shaǵym túsirgen.
Sotqa deıingi tergeý barysynda alaıaqtyń áreketinen elimizdi ártúrli óńirinde turatyn 300-den astam adamnyń zardap shekkeni anyqtaldy.
Atalǵan fakti boıynsha QR QK 217-baby boıynsha sotqa deıingi tergeý jumystary júrip jatyr, kúdikti tergeý ızolıatoryna qamaldy.
