Elordada qarjy pıramıdasyn uıymdastyrǵan er adam 8 jylǵa sottaldy
2023 jylǵy 15 naýryzda Astana qalasy Saryarqa aýdanynyń №2 aýdandyq soty qarjylyq pıramıda qurý jáne ony basqarý, sondaı-aq alaıaqtyq jasaý faktisi boıynsha qylmystyq istiń aıyptaý úkimin shyǵardy.
M. esimdi er adam 2019 jyldyń qazan-jeltoqsan aılarynda 6 adamdy qylmystyq topqa qatystyryp, kásipkerlik qyzmetke elikteý maqsatynda birneshe jaýapkershiligi shekteýli seriktestikti satyp alyp, solardyń kompanııalary kólik quraldaryn naryqtaǵy baǵadan tómen satýmen aınalysady degen aqparat taratqan.
Osylaısha, 2019 jyldyń naýryzy men 2021 jyldyń qazan aılary aralyǵynda «Mega-General Company», «Mega-General Co», «NurAutoKz» JShS jáne JK «Nur-Ai» 300-den astam tulǵamen kelisim-shart jasasyp, azamattardyń jalpy somasy 7,5 mlrd teńgeni quraıtyn aqshalaı qarajaty men múlkin tartty.
M. sondaı-aq alaıaqtyq jasaǵany úshin aıyptaldy. Qarjy pıramıdasynyń qyzmetin qoldaý maqsatynda atalǵan tulǵalar alaıaqtyq jáne senimge qııanat jasaý arqyly alǵan kólikterin kepilge qoıyp, nesıe berip, sondaı-aq avtokólikterdi satamyz dep sendirip, 25-ten astam jábirlenýshiniń qomaqty aqshasyn ıemdenip alǵan.
Prokýror sottan M-dy 10 jylǵa bas bostandyǵynan aıyrý jazasyn berýdi, al qorǵaýshy tarap sottalýshynyń kinásizdigine baılanysty ony aqtaýdy surady. Jábirlenýshilerge keltirilgen materıaldyq shyǵyn ótelgen joq.
Sot úkimi kelesideı boldy: M. uıymdasqan top qurý jáne oǵan jetekshilik etý (QK-niń 262-babynyń 1-bóligi), qarjylyq (ınvestıtsııalyq) pıramıda qurý (QK 217-babynyń 3-bóligi), sondaı-aq qylmystyq toptyń quramynda asa iri mólsherde alaıaqtyq jasaǵany úshin (QK 190-baby 4-bóliginiń 1, 2) tarmaǵy) kináli dep tanyldy.
Sot jazany jeńildetetin mán-jaılar retinde sottalýshynyń 3 kishkentaı balasy bar ekenin anyqtady. Eshqandaı aýyrlatatyn mán-jaılar bolǵan joq.
Qylmystyq quqyqbuzýshylyqtardyń jıyntyǵy boıynsha sot M-dy kináli dep tanyp, 8 jylǵa bas bostandyǵynan aıyrý jazasyna kesti. Sondaı-aq ol 7 jyl merzimge azamattardyń qarajaty men ınvestıtsııa tartýmen baılanysty qyzmetpen aınalysý, sondaı-aq kommertsııalyq jáne kommertsııalyq emes uıymdarda basshylyq qyzmetterdi atqarý quqyǵynan aıyryldy.
Sot jábirlenýshilerdiń azamattyq talaptaryn qanaǵattandyrdy. Úkim zańdy kúshine engen joq.
