Elordada qarjy pıramıdasyn qurǵan áıel adamdardy aldap 60 mln teńge jınap alǵan
NUR-SULTAN. QazAqparat – Elordanyń quqyq qorǵaýshylary azamattardy qarjy pıramıdasynan saq bolýǵa shaqyrady, dep habarlaıdy QazAqparat tilshisi qalalyq Polıtsııa departamentine silteme jasap.
Qazirgi ýaqytta qala saqshylary qarjy pıramıdasyn qurdy degen kúdikpen qala turǵyny (áıel) men onyń birneshe sybaılasy boıynsha is júrgizip jatyr. Іstiń júrgizilýine 30 salymshynyń polıtsııaǵa aryzdanýy sebep bolyp otyr. WhatsApp arqyly «Realnye dohody 1», «Realnye dohody 2» jáne «Trıýmf» chattaryn quryp, áıel astanalyqtar men basqa da óńirlerde turatyn azamattardyń aqshasyn jınap alǵan.
«Azamattardyń senimin, qarjylyq saýatynyń azdyǵyn paıdalanyp, kúdikti olardy bul jobadan eshqandaı qaýip joqtyǵyn aıtyp sendirgen. Jobaǵa aqsha salǵan adam 5-15 kúnniń ishinde 100 paıyzdyq kiriske ıe bolatynyn alǵa tartqan. Azamattar osylaısha, jobaǵa 20 myń teńgeden 2 mln teńgege deıin aqsha salǵan. Salymshylardyń basym kópshiligi aqshasyn qaıtara almaǵan», - dep habarlaıdy departamentten.
Osylaısha, tergeý nusqasyna saı, ákki áıeldiń 32 adamdy aldap, 60 mln teńge ıemdengeni anyqtalyp otyr. Alaıda aldanǵandardyń sany odan da kóp bolýy múmkin.
«Eger siz nemese jaqyndaryńyz atalǵan qarjy pıramıdasyna aqsha salyp, aldanǵan bolsa, Beıbitshilik kóshesi 19 mekenjaıyndaǵy polıtsııa departamentine júginýińizdi suraımyz», - delingen habarlamada.
Qalalyq polıtsııa departamenti azamattardy qarjy pıramıadasynan saq bolýǵa, kúdikti qarjylyq uıymdarǵa aqshany salmaýǵa shaqyrady. Quqyq qorǵaýshylar eger bir adamdar sizderdi qysqa merzimniń ishinde mol kiriske ıe bolasyz dep sendirse, aldyńyzda qarjy pıramıdasy turǵanyn, oǵan salǵan aqshańyzdy joǵaltyp alatynyńyzdy eskertedi.
