Elordada káriz tazartý qurylystary salynady

ASTANA. KAZINFORM – Bas qalanyń ákimi Jeńis Qasymbek Instagram-daǵy paraqshasynda jańadan salynyp jatqan káriz tazartý qurylystary týraly jazdy, dep habarlaıdy elorda ákimdiginiń resmı saıty. 

– Qazirgi ýaqytta sharýashylyq-turmystyq aǵyn sý táýligine 254 myń m³ qýattylyǵy bar №1 kárizdik tazartý qurylysy (KTQ №1) arqyly tazartylyp jatyr. Qalanyń damýy men turǵyndar sanynyń jyl saıyn ósip kele jatqanyn eskersek, qosymsha tazartý qurylystaryn salý qajettiligi týyndap otyr. Máselen, qoldanystaǵy kárizdik tazartý qurylysyn (KTQ) jańǵyrtý jobasy ázirlenip jatyr, onyń aıasynda óndiristik qýatyn táýligine qosymsha 25 myń m³ deıin arttyrý kózdelgen.

Sonymen qatar KTQ-1-den Qarabıdaıyq jınaqtaǵyshyna deıingi kárizdik kollektordy qaıta jańartý jumysyna kiristik. Budan bólek, táýligine 188 myń m³ ónimdiligi bar shyǵarý kollektorlarymen birge KTQ-2 jobasyn ázirleý jumysy aıaqtaldy. Sol sııaqty qalada Kóktal-1 eldi mekeninde (táýligine 60 myń m³), Óndiris eldi mekeninde (táýligine 10 myń m³) jáne Indýstrııalyq parkte (táýligine 15 myń m³) lokaldy kárizdik tazartý qurylysyn salý jobalaryn iske asyrý bastaldy. Atalǵan nysandardyń jalpy ónimdiligi táýligine 85 myń m³ quraıdy, - dep jazdy Jeńis Qasymbek. 

Aımaq basshysy atalǵan jobalardyń júzege assa qoldanystaǵy kárizdik tazartý qurylysyna túsetin júkteme azaıatynyn, bul jumystardyń qashan aıaqtalatynyn aıtty. 

– Jobalardy 2028-2029 jyldary aıaqtaý josparlanyp otyr. Nátıjesinde qaladaǵy sý burý máselesi tolyqtaı sheshiledi. Sondaı-aq nóserli káriz júıesin jańǵyrtý aıasynda nóserli, drenajdy jáne aryq-naýa tıptegi magıstraldy káriz jelileriniń 30 shaqyrymnan astamy tóseldi. Budan bólek, 9 sorǵy stantsııasy men 7 tazartý qurylysy salyndy jáne qaıta jańǵyrtyldy. Nátıjesinde sý jınaý alańy 15,3 myń gektarǵa deıin ulǵaıtyldy jáne ózge de keshendi jumystar atqaryldy, - dep jazdy qala ákimi. 

Buǵan deıin Jeńis Qasymbek LRT jelisi qashan iske qosylatynyn aıtqan edi.