Elordada Qarýly kúshterdiń úzdik mergenderi anyqtaldy
ASTANA. KAZINFORM – Astanada Qorǵanys mınıstrligi, Bas shtab jáne Qarýly kúshter qurylymdyq bólimsheleri arasyndaǵy XVI Spartakıada aıasynda tabeldik qarýmen atýdan chempıonat ótti.
Qorǵanys mınıstrliginiń Sport komıteti – Armııa ortalyq sport klýby uıymdastyrǵan jarysqa quramynda 246 áskerı qyzmetshi bar 40 komanda qatysty. Chempıonat erejesine sáıkes, mergender Makarov tapanshasy men Kalashnıkov avtomatynan dáldep atý boıynsha eki topta ózara synǵa tústi.
Alǵashqy topta Qorǵanys mınıstrligi men Bas shtab qurylymdyq bólimsheleriniń ókilderi baq synasty. Bul topta jalpy komandalyq esepte birinshi oryndy Aqparattyq tehnologııalar departamenti ıelense, ekinshi oryn Ákimshilik departamentine buıyrdy. Al úshinshi oryndy Jaýyngerlik daıyndyq departamenti men Serjanttar quramymen jumys basqarmasynyń birikken komandasy enshiledi.
Ekinshi topta Qarýly kúshterdiń bas basqarmalary, basqarmalary, áskerı bólimderi men mekemeleriniń áskerı qyzmetshileri synǵa tústi. Nátıjesinde 14776 áskerı bólimi birinshi orynǵa ıe boldy. Ulttyq qorǵanys ýnıversıtetiniń komandasy ekinshi orynǵa turaqtasa, úshinshi oryn Qurlyq áskerleri bas qolbasshysy basqarmasyna buıyrdy.
Jeńimpazdar men júldegerler kýboktarmen, gramotalarmen jáne baǵaly syılyqtarmen marapattaldy. Sonymen qatar,erler men áıelder arasyndaǵy úzdik mergender anyqtalyp, olardyń kásibı sheberligi erekshe atalyp ótti.
Mundaı jarystar áskerı qyzmetshilerdiń jaýyngerlik ázirligin arttyryp qana qoımaı, bólimsheler arasyndaǵy yntymaqtastyqty nyǵaıtýǵa yqpal etedi. Qatysýshylardyń aıtýynsha, chempıonat tájirıbe almasýǵa jáne ózara básekelestikti damytýǵa jaqsy múmkindik boldy.
Eske sala keteıik, budan buryn Qarýly kúshter bólimshelerdiń daıyndyq deńgeıin reıtıng arqyly baǵalaıtynyn jazǵanbyz.