Elordada qart adamdardy áleýmettik qorǵaý máseleleri talqylandy
ASTANA. 4 qazan. QazAqparat - Búgin Astanada Halyqaralyq qarttar kúnin atap ótý aıasynda qarııalardy áleýmettik qorǵaý máseleleri men problemalaryn talqylaýǵa arnalǵan dóńgelek ústel otyrysy ótti, dep habarlaıdy elordanyń resmı saıtynan.
Otyrys barysynda merekege oraılastyrylǵan aılyq aıasynda qarııalarǵa arnalǵan áleýmettik-mádenı jáne t.b. is-sharalar máseleleri, jergilikti jerlerde tájirıbelik kómek kórsetý, josparlanǵan qaıyrymdylyq sharalaryn qamtamasyz etý jáne qarttardy áleýmettik qoldaýǵa qatysty birqatar máseleler talqylandy.
«Qazirgi ýaqytta Astanada 55 myńnan astam zeınetker turady, sonyń ishinde 271-i - Uly Otan soǵysynyń ardageri, 4483-i - tyl eńbekkeri. Qarttar kúnin atap ótý aıasynda elordada ardagerlerge qurmet kórsetý, olardyń qajettilikterine nazar aýdarý dástúri qalyptasqan. Bul kúni barlyq uıymdar men kásiporyndar túrli qaıyrymdylyq is-sharalaryn uıymdastyryp, merekelik dastarhan jaıady. Azamattardyń jeke sanattary, sonyń ishinde zeınetkerler jasyna qaraı qoǵamdyq kólikterde tegin júredi» - deıdi Jumyspen qamtý jáne áleýmettik baǵdarlamalar basqarmasynyń basshysy Alma Altybaeva.
Onyń aıtýynsha, 1982 jyldan beri Astanada úıde áleýmettik qyzmet kórsetýdiń 4 bólimi jumys istep keledi. Búginde olar 313 jalǵyz basty qarııaǵa jáne eńbekke qabiletsiz azamatqa qyzmet kórsetedi.
«Byltyr zeınetkerlerge jalpy somasy 970 mln teńgege kómek kórsetildi», - dedi Alma Altybaeva.
Eske salaıyq, jyl saıyn 1 qazanda álem boıynsha Halyqaralyq qarttar kúni atap ótiledi. Osy kúni «Jastar» saraıynda zeınetkerlerge arnalǵan merekelik kontsert uıymdastyryldy. Budan basqa, Jumyspen qamtý jáne áleýmettik baǵdarlamalar basqarmasy Qarttar kúnine oraı 70-ten asqan egde jastaǵy 20 774 adamǵa 3 myń teńge kóleminde bir rettik materıaldyq, 4 myńnan astam adamǵa qaıyrymdylyq kómek kórsetildi. Ardagerler keńesiniń belsendileri zeınetkerler men tyl eńbekkerlerine úıde qyzmet kórsetýdi uıymdastyrdy. Aýdandardyń ákimdikteri demeýshilik uıymdarmen birlesip jalǵyz basty qarııalarǵa azyq-túlikter jetkizdi, kememen serýenge shyǵardy, dastarhan jaıyp, tegin fılmder kórsetip, áskerı dańq murajaıyna, elordalyq tsırkke tegin apardy. Sondaı-aq, turmysy tómen jáne jalǵyz basty 2006 adamǵa qatty otyn (60 tonna) satyp alyndy.
