Elordada qarsy jolaqqa shyqqan 9 avtobýs júrgizýshisi kólik júrgizý quqyǵynan aıyryldy

NUR-SULTAN. QazAqparat – 4-13 qazan aralyǵynda Elorda joldaryndaǵy jazataıym oqıǵalardy azaıtý, sondaı -aq qoǵamdyq kólik júrgizýshileriniń jol qozǵalysy erejelerin buzý faktilerin boldyrmaý maqsatynda elorda aýmaǵynda «Avtobýs» jedel aldyn alý sharasy ótkizilýde, dep habarlaıdy QazAqparat Nur-Sultan qalalyq Polıtsııa departamentiniń baspasóz qyzmetine silteme jasap.

Jedel aldyn alý is-sharasy bastalǵaly avtobýs júrgizýshileri jibergen 700-ge jýyq quqyq buzýshylyq faktisi anyqtaldy. Onyń ishinde 214-i – manevr jasaý erejesin buzý faktisi, 167-si kólik quralyn basqarý kezinde telefondy qoldaný faktisi, 80-i – tehnıkalyq tekserýden ótpeý faktisi.

Ereje buzǵany úshin avtobýs parkiniń 15 laýazymdy tulǵasy ákimshilik jaýapqa tartyldy.

Sondaı-aq, polıtsııa qyzmetkerleri Turan dańǵylymen Syǵanaq kóshesi jaǵyna qaraı kele jatyp, qarsy qozǵalys jolaǵyna shyǵyp ketken 29 jastaǵy marshrýttyq avtobýstyń júrgizýshisin anyqtady. Avtobýs júrgizýshisine qatysty QR ÁQBtK 596-babynyń 3-tarmaǵy boıynsha ákimshilik hattama toltyryldy.

Qarama-qarsy qozǵalysqa arnalǵan júris bóliginiń jaǵyna shyǵyp ketkeni úshin júrgizýshige alty aı merzimge kólik quralyn júrgizý quqyǵynan aıyrý qaýpi tónip tur.

Kólik kásiporyndarynyń júrgizýshileri jibergen barlyq quqyq buzýshylyqtar faktisi boıynsha basshylar ákimshilik jaýapqa tartyldy.