Elordada káriz qaqpaqtaryn urlaýmen aınalysqan kúdikti ustaldy

NUR-SULTAN. QazAqparat – Nur-Sultan qalasy Almaty aýdanynyń aýmaqtyq polıtsııa basqarmasy káriz lıýkterin urlady degen kúdikke ilingen elordanyń 23 jastaǵy turǵynyn ustady, dep habarlaıdy QazAqparat Nur-Sultan qalasynyń polıtsııa departamentine silteme jasap.

Tergeý barysynda ustalǵan azamattyń úsh kún boıy túngi ýaqytta qala aýdandarynyń birinde kóligimen júrip, lıýkterdi urlap júrgeni anyqtaldy.

Jas jigit jalpy somasy 400 myń teńgege 9 lıýkti sheship alyp, olardy metall qabyldaý oryndaryna tapsyryp úlgergen.

Jedel izdeý sharalaryn júrgizý kezinde kúdikti azamattyń esimi men ornalasqan jeri anyqtaldy.

Ol óz kinásin moıyndady. Er adamnyń buryn jasalǵan osyǵan uqsas qylmystarǵa qatysy anyqtalýda.

Elordanyń polıtsııa departamenti azamattardy qyraǵy bolýǵa shaqyrady.

«Eger siz kúdikti azamattardy baıqap qalsańyz, polıtsııa nemese «102» nómiriniń mobıldi qosymshasyna habarlaýyńyzdy suraımyz» dep eskertedi polıtsııa.