Elordada qardy ýaqytyly tazalamaǵandarǵa aıyppul salyndy
NUR-SULTAN. QazAqparat – 2020 jyly bastalǵaly qardy ýaqytynda tazalamaǵan 200-ge jýyq quqyqbuzýshylyq tirkelip, nátıjesinde kinálilerge 4,98 mln teńgeniń aıyppuly salyndy, dep habarlaıdy QazAqparat tilshisi.
Bul týraly Nur-Sultan qalasy Polıtsııa departamenti Jergilikti polıtsııa qyzmeti basqarmasy tabıǵatty qorǵaý polıtsııasy tobynyń ınspektory Albına Berkinbaeva málim etti
«Elordanyń sanıtarlyq jaǵdaıyn jaqsartý maqsatynda tabıǵatty qorǵaý polıtsııasy tobynyń qyzmetkerleri kún saıyn qaladaǵy qar tazalaý jumystaryn qadaǵalaıdy. Jyl basynan beri qardy ýaqytynda tazalamaǵany úshin 172 quqyqbuzýshy jaýapqa tartylyp, olarǵa 4 mln 985 myń 985 teńge aıyppul salyndy. Sondaı-aq, qar tazalaý jumystaryn durys jáne ýaqytynda atqarmaǵan, sol sııaqty isine salǵyrt qaraǵan 26 PIK, JShS uıymy ákimshilik jaýapkershilikke tartyldy. Jáne olarǵa 954 myń teńge aıyppul salyndy. Sonymen qatar, kvartal aralyq aýmaqtardyń tazalyǵyna jaýapty merdiger uıymdarǵa da baqylaý kúsheıtildi. 2020 jyl bastalǵaly 30 astanalyq merdiger uıym ákimshilik jaýapkershilikke tartylyp, olarǵa 2 mln 315 myń 290 teńgeniń aıyppuly salyndy», - dedi A. Berkinbaeva ákimdikte ótken jıyn barysynda.
Odan bólek, polıtsııa ınspektory jeke aýmaqtardyń ıesi bolyp tabylatyn shaǵyn jáne orta kásipkerlik ókilderiniń de jaýapqa tartylǵanyn tilge tıek etti.
«Abattandyrý erejelerine sáıkes, shaǵyn jáne orta kásipkerler men ǵımarattardy jalǵa alýshylar ózderine tıesili aýmaqtardyń qaryn sanıtarlyq erejeni saqtap, ýaqytyly tazartýy tıis. Degenmen oǵan salǵyrt qaraıtyndar bar. Oǵan dálel, jyl basynan elordada 87 shaǵyn jáne orta kásipkerlik nysany jaýapkershilikke tartylyp, olarǵa 788 myń 850 teńgeniń aıyppulyn tóleý mindetteldi. Sol sııaqty qardy belgilenbegen jerge tókken 29 aýyr júk kóliginiń júrgizshileri jazalandy. Olar jalpy somasy 927 myń 850 teńge tóleýge tıisti», - dedi ol.
