Elordada qardy kúremegen iri saýda ortalyqtary, PIK-ter aıyppul tóleýde

NUR-SULTAN. QazAqparat – Elordada irgeles ornalasqan jáne ózine bekitilgen aýmaqty qar men muzdan ýaqytyly tazartpaǵan 120 Páter ıeleri kooperatıvine (PIK) 5 725 000 teńge aıyppul salyndy, dep habarlaıdy QazAqparat qala ákimdigine silteme jasap.

Polıtsııa departamentiniń aqparatyna sáıkes, jergilikti polıtsııa qyzmetkerleri kún saıyn qalany qar men muzdan tazartý jumysyn qadaǵalap otyrady.

PIK-terden bólek, sondaı-aq qys bastalǵaly qardy ýaqytyly shyǵarmaǵan 481 shaǵyn jáne orta bıznes sýbektisi ákimshilik jaýapkershilikke tartyldy. Aıyppul sommasy 4 424 000 teńgeni qurady.

Aýlalardy tazartýmen aınalysatyn merdiger uıymdarǵa baqylaý kúsheıtildi. Jyl basynan beri 95 merdigerge abattandyrý erejelerin buzǵany úshin 7 047 000 teńge aıyppul salyndy.

Jekemenshik júk kólikteriniń 92 júrgizýshisi 2 143 000 teńge aıyppul tóledi. Atap aıtsaq, ekologııalyq polıtsııa qyzmetkerleri «Azııa park» SOSO, «Han Shatyr» SOSO, «MEGA Silk Way» SOSO aýmaqtaryn ýaqytyly tazartýdy qamtamasyz etpegen «Mega Plaza» JShS, «Rem.kz» JShS, «Tazartý» JShS-ny ákimshilik jaýapkershilikke tartty. Bul uıymdardyń árqaısysyna júz myń teńgeden astam aıyppul salyndy.

Qar tazartý mashınalarynyń jumysyn qıyndatýǵa ákep soǵatyn jol boıynda qaldyrylǵan kólikter boıynsha jumystar júrgizilýde. «102» pýltine kommýnaldyq jáne qyzmet kórsetýshi uıymdardyń jumysyna kedergi keltiretin avtomobılderge qatysty 1 925 qońyraý tústi. Nur-Sultan qalasynyń Polıtsııa departamenti shaǵyn jáne orta bıznes sýbektilerin, jekemenshik sektorlardyń turǵyndaryn sý tasqynynyń aldyn alý úshin óz aýdandaryndaǵy qardy ýaqytyly shyǵarýdy suraıdy.