Elordada karate-dodan Azııa chempıonaty ótýde
ASTANA. QazAqparat - 13-16 shilde aralyǵynda Qazaqstannyń karate-do federatsııasy eresekter arasynda XIV chempıonat jáne jasóspirimder men kadetter arasynda XVI Azııa chempıonatyn ótkizedi, dep habarlaıdy qalalyq ákimdiktiń baspasóz qyzmeti.
Halyqaralyq mamandandyrylǵan EKSPO-2017 kórmesi aıasynda Astanada jasóspirimder men kadetter arasynda (14 jastan 20 jasqa deıin) Azııa chempıonaty ótedi. Onda Azııa qurlyǵynan 30-ǵa jýyq elden 700-den astam qatysýshy ózara myqtyny anyqtaıdy. Azııa birinshiligi Qazaqstanda alǵash ótedi, buǵan deıin Malaızııa, Sıngapýr, Japonııa jáne Qytaı memleketterinde ótken bolatyn. Jarys Azııada ǵana emes, búkil álemde esimi belgili sportshylardy jınaıdy.
Karate-dodan Qazaqstan ulttyq quramasynyń namysyn 70 qatysýshy qorǵaıdy. Olardyń ishinde álem jáne Azııa chempıonattarynyń jeńimpazdary bar.
Karate olımpıadalyq oıyn túrleri qataryna qosylǵandyqtan, bul qurlyqtyq chempıonatta reıtıngtik upaılar beriletin bolady. Memleket ishinde eń kóp upaı kadetter men jasóspirimder arasynda álem chempıony, Azııa oıyndarynyń chempıony, Azııanyń úsh dúrkin chempıony Saǵyndyqov Rınattyń enshisinde - 1215 upaı bar. Birneshe dúrkin chempıon eresekter arasynda 67 keli salmaq boıynsha synǵa túsedi.
Jarys aıasynda tóreshiler úshin tájirıbelik jáne teorııalyq semınarlar ótkiziledi. Onda «Judge B» sanatyna halyqaralyq tóreshilerdi attestattaý bolady. Týrnır barysynda sheteldik sportshylardy «EKSPO-2017» kórmesine aparý uıymdastyrylady.
Kez kelgen adam jarysty tamashalaı alady, kirý tegin.
