Elordada «Qaraótkel 2010» dep atalatyn Qazaqstan agroónerkásip kesheni jetistikteriniń І jármeńkesi ótedi
ASTANA. Shildeniń 8-i. QazAqparat /Marlan Jıembaı/ - Shildeniń 31-i men tamyzdyń 1-i kúnderi elordadaǵy «Metro» kóterme saýda ortalyǵynyń aýmaǵynda «Qaraótkel 2010» Qazaqstan agroónerkásip kesheni jetistikteriniń І jármeńkesi ótedi.
Bul týraly búgin Astanada ótken baspasóz máslıhaty barysynda Aýyl sharýashylyǵy vıtse-mınıstri Arman Evnıev málim etti.
«Qaraótkel» jármeńkesi bizdiń agrarlardyń mal sharýashylyǵy salasynda, sondaı-aq aýyl sharýashylyǵynyń basqa da sektorlaryndaǵy jetistikterin kórsetýge baǵyttalǵan», dep atap ótken vıtse-mınıstrdiń sózine qaraǵanda, aǵymdaǵy jyly oǵan 300-den astam kompanııa qatyspaq. Qatysýshylardyń arasynda memlekettik organdardyń, qaıta óńdeý kásiporyndarynyń ókilderi, tehnıkalar men qural jabdyqtardy jetkizýshiler, sharýa qojalyqtardyń basshylary, sonymen qatar Qazaqstannyń jáne shet elderdiń ǵylymı jáne iskerlik ókilderi qatysady.
Sonymen qatar jármeńke aıasynda aýyl sharýashylyǵy taýarlaryn óndirýshiler úshin aýyl sharýashylyǵyndaǵy marketıng, mal sharýashylyǵy salasyndaǵy jáne aýyl sharýashylyǵyn qaıta óńdeýdegi ǵylymı jetistikter boıynsha semınar-keńester ótkiziledi.
