Elordada karantın: Volonterler kóshede baýyrsaq taratyp, halyq kóńilin kóterdi

NUR-SULTAN. QazAqparat - Bıyl elordada Naýryz meıramyn toılaý «Qaıyrymdy ister» uranymen ótedi. Qazaqstan halqy Assambleıasynyń qalalyq fılıaly merekege oraı «Baýyrsaq party» qaıyrymdylyq aktsııasyn ótkizdi, dep habarlaıdy QazAqparat Nur-Sultan ákimdiginiń resmı saıtyna silteme jasap.

Elordalyq Qazaqstan halqy Assambleıasynyń ókilderi qala turǵyndaryna ózderi daıyndaǵan baýyrsaqtardy tartý etti.

Dástúrli aktsııaǵa qatysýshylardy kóktemniń basty merekesimen QR Májilisiniń depýtaty Vladımır Tohtasýnov quttyqtady. Ol barlyǵyna densaýlyq, baqyt jáne amandyq tiledi.

«Ahyska» túrik etnomádenı ortalyǵynyń jetekshisi Ásker Pırıev túsindirip ótkendeı, pandemııaǵa baılanysty buqaralyq mádenı is-sharalardy ótkizý múmkin emes, sondyqtan qalanyń tórt aýdanyndaǵy barlyq júrginshilerge baýyrsaq taratylyp, izgi tilekter joldandy.

«Búgin Naýryzdy toılaý aıasynda «Baýyrsaq party» ótkizemiz. Qalanyń barlyq 4 aýdanynda kóshedegi barlyq adamǵa baýyrsaq taratyp, merekemen quttyqtaımyz. Sol arqyly bizdiń merekemiz ben ulttyq taǵamymyzdy nasıhattaımyz. Baýyrsaq – Qazaqstan halqynyń birligi faktory. Búginde ol bizdi barlyq ýaqytta biriktirgendeı biriktiredi», – dedi ol.

Aktsııa elordalyq Dostyq úıinde bastaldy. Ystyq baýyrsaqtary bar kólikter adamdar kóp jınalatyn oryndarǵa bet aldy.

Uıymdastyrýshylar is-shara ulttyq merekeniń jalpy rýhyn qoldaý maqsatynda, sondaı-aq elorda turǵyndary men qonaqtaryna kóterińki kóńil-kúı syılaý úshin ótkiziletinin atap ótti.

Sonymen qatar, bul kúni QHA músheleri kómekke muqtaj 30 otbasyna azyq-túlik sebetin jetkizedi.

«Merekege oraı bir apta boıy kópbalaly otbasylarǵa, erekshe bala tárbıelep otyrǵan otbasylarǵa azyq-túlik sebetterin jetkizetin bolamyz. Jaqynda Aqkóldegi balalar úıiniń tárbıelenýshilerine syılyqtar, kitaptar syıladyq, olardy ulttyq dástúrlermen tanystyrdyq», — dedi Qazaqstan halqy Assambleıasynyń eriktisi Nargızam Mahmýdova.

Igi ister budan ári de jalǵasyn tabady. Naýryz meıramyna oraı eki myńǵa jýyq azyq-túlik sebetin taratý josparlanyp otyr.