Elordada karantın tártibin buzǵandar 150 mln teńgeden astam aıyppul tóledi
NUR-SULTAN. QazAqparat – Elordada karantın tártibin buzǵandar 150 mıllıon teńgeden astam aıyppul tóledi. QazAqparat bul týraly qala ákimdiginiń saıtyna silteme jasap habarlaıdy.
Nur-Sultanda mobıldi toptar shaǵyn jáne orta bıznes sýbektilerine reıdterdi jalǵastyrýda.
Polıtsııa departamentinen málim etkendeı, keıbir oıyn-saýyq mekemeleri men turǵyndar COVID-19 taralý qaýpi artqanyna qaramastan, erejelerdi elemeı keledi.
Atap aıtqanda, 16 qarasha kúni saǵat 00: 39-da mobıldi top «Qwartet» karaoke-barynda 40-qa jýyq adam bolǵanyn anyqtady. 15 qarasha kúni saǵat 23.54-te «Tequila» laýndj-barynda 50-ge jýyq demalýshy otyrǵan.
Al 14 qarashada saǵat 22:00-de «Zeıd» meıramhanasynda otbasylyq mereke ótken. 40-tan astam qonaq 50 jyldyq mereıtoıǵa jınalǵan.
«Mekeme ıelerine qatysty jınalǵan materıal protsessýaldyq sheshim qabyldaý úshin Nur-Sultan qalasynyń Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
Jalpy alǵanda, 9 - 15 qarasha aralyǵynda mobıldi toptar Almaty aýdanynda - 14, Baıqońyr aýdanynda - 7, Esil aýdanynda – 18, Saryarqa aýdanynda 18 buzýshylyq anyqtady.
16 qarashadaǵy jaǵdaı boıynsha, Nur-Sultan qalasynyń Taýarlar men kórsetiletin qyzmetterdiń sapasy men qaýipsizdigin baqylaý komıtetiniń aýdandyq basqarmalaryna karantındi buzǵan adamdarǵa qatysty aýdandyq polıtsııa basqarmalarynan 2043 materıal kelip tústi. Jalpy somasy 193 288 236 teńgeni quraıtyn 963 jeke jáne zańdy tulǵa ákimshilik jaýapkershilikke tartyldy.
Búgingi tańda jalpy somasy 151 324 915 teńgege 752 ákimshilik aıyppul tólendi», - delingen aqparatta.
