Elordada karantın talaptaryn eń kóp buzatyn kimder
NUR-SULTAN. QazAqparat - Nur-Sultan qalasynda monıtorıngtik toptar oıyn-saýyq mekemelerine salynǵan tyıymnyń buzý faktilerin anyqtap, jolyn kesýdi jalǵastyrýda, dep habarlaıdy ákimdiktiń resmı saıty.
Jurt kóp jınalatyn oryndar koronavırýs ınfektsııasynyń oshaǵyna aınalatyny belgili.
Dárigerlerdiń aıtýynsha, eń aldymen oıyn-saýyq, tamaqtaný oryndary jáne saýda nysandary – indet taralatyn oshaqtardyń biri. Ókinishke oraı, keıbir shaǵyn jáne orta bıznes ókilderi karantın talaptaryn júıeli túrde buzady.
Mysalǵa ákimshilik sot «Alanya» túngi klýbynyń qyzmetin 3 aıǵa toqtatty jáne 100 AEK mólsherinde aıyppul saldy. Sol sııaqty «Janym Sol» karaoke-bary, «Zoloto» meıramhanasy jáne «Tequila» kafe-bary bir aı jumys istemeıdi, sondaı-aq 70 AEK mólsherinde aıyppul tóleıdi.
«Karantın talaptaryn qasaqana buzǵany úshin elordanyń birqatar túngi klýby men qoǵamdyq tamaqtaný nysandaryna qatysty taǵy segiz materıal sot qaraýynda jatyr. Buryn atalǵan sýbektilerge zań buzýdy toqtatý týraly uıǵarymdar berilgen. Quqyq buzýshylarǵa qatysty qyzmetti toqtata turý týraly sot aktisi oryndalmaǵan jaǵdaıda ákimshilik qamaýǵa alý sharalary qabyldanady», – delingen elordalyq prokýratýranyń habarlamasynda.
COVID-19 indetin taratpaý jónindegi vedomstvoaralyq komıssııanyń derekteri boıynsha karantın talaptaryn mynadaı nysandar turaqty buzyp keledi: qoǵamdyq tamaqtaný nysandary (meıramhanalar, laýndj barlar, banket zaldary) – 160, saýda nysandary (dúkender, sýpermarketter) – 57, oıyn-saýyq oryndary (karaoke, túngi klýb) – 37, kompıýterlik jáne oıyn klýbtary, SOO janyndaǵy Batýt ortalyǵy, oıyn-saýyq ortalyǵy, boýlıng ortalyǵy) – 33, basqa obektiler (kınorýmdar, sulýlyq salondary, saýnalar, monshalar, massaj kabınetteri, shınomontaj) – 28.
Zań buzýshylar tiziminde mynadaı jaıttar jıi kezdesedi: buqaralyq is-sharalar ótkizý, jumys rejımin, kelýshilerdiń belgilengen sanyn (30-dan astam), nysan jumyskerlerimen (daıashylar,satýshylar) betperde rejımin saqtamaý, oıyn-saýyq mekemeleriniń jumysyna salynǵan tyıymdy elemeý.
Elordanyń sanıtarlyq-epıdemıologııalyq baqylaý departamentiniń aqparatyna sáıkes, ótken jyldyń 5 shildesinen 31 jeltoqsanyna deıin shekteý jáne karantın talaptaryn buzǵany úshin 1 454 jeke, laýazymdy jáne zańdy tulǵalar jalpy somasy 283 616 250 teńgege ákimshilik jaýapqa tartyldy.
