Elordada karantın talaptaryn buzýdyń 34 faktisi anyqtaldy
NUR-SULTAN. QazAqparat – Polıtsııa qyzmetkerleri, epıdemıologtar, eriktiler, jergilikti atqarýshy organ ókilderinen qurylǵan mobıldi toptar karantın rejımin buzý faktilerin anyqtaý boıynsha jumysty jalǵastyryp keledi, dep habarlaıdy QazAqparat elordlyq Polıtsııa departamentiniń baspasóz qyzmetine silteme jasap.
Tekseris barysynda polıtseıler kaladaǵy oıyn-saýyq, kóńil kóterý oryndary, qoǵamdyq tamaqtaný nysandary, haýyz, monshalarǵa kirip, olardyń ıelerin karantın rejımine baılanysty shekteý sharalary týraly eskertip, sondaı-aq, zańbuzýshylyqtardy anyqtap jatyr.
Osylaısha, bıylǵy jyldyń 4 qazanynda, tańǵy saǵat 05:00 shamasynda polıtsııa bólimine qala turǵyny telefon soǵyp, Shevchenko kóshesindegi «Ýgol 4/1» dámhanasynyń karantın talaptaryn buzyp jatqany týraly habarlady. Oqıǵa ornyna shyqqan tártip saqshylary dámhananyń ishinde ondaǵan kelýshi otyrǵanyn anyqtady.
«Ýgol 4/1» dámhanasynyń ıesi karantın talaptaryn buzǵany úshin buǵan deıin birneshe ret ákimshilik jaýapqa tartylǵanymen, Bas sanıtarlyq dáriger qaýlysynyń normalaryn áli de buzyp keledi.
Dámhana ıesine qatysty QR Ákimshilik quqyqbuzýshylyqtar týraly kodeksiniń 425-babymen ákimshilik óndiris qozǵaldy.
Elordanyń polıtsııa departamenti azamattardy karantın talaptaryn buzǵany úshin jaýapqa tartylatynyn eskertip, sanıtarlyq normalardy saqtaýǵa shaqyrady.
