Elordada karantın talaptaryn buzǵan birqatar nysan anyqtaldy
NUR-SULTAN. QazAqparat – Nur-Sultanda karantın talaptaryn buzýshylardy anyqtaý jáne tıisti shara qoldaný jumystary jalǵasýda, dep habarlaıdy QazAqparat qalalyq Polıtsııa departamentiniń baspasóz qyzmetine siltee jasap.
Baspasóz qyzmeti taratqan málimetterge qaraǵanda, Nur-Sultan qalasynda mobıldi toptar bir táýlikte 60-qa jýyq nysandy tekserip, 8 karantın rejımin buzý jaǵdaıyn anyqtady.
Naqtyraq aıtqanda, bas sanıtarlyq dárigerdiń koronavırýs ınfektsııasynyń taralýyna jol bermeý jónindegi qoldanystaǵy qaýlysyn ákimshilik pen qoǵamdyq tamaqtaný nysandary men oıyn-saýyq oryndarynyń ıeleri júıeli túrde buzyp, sanıtarlyq talaptardy eskermeı otyr.
Mysaly, saǵat 23:00-de Samal kóshesindegi «Respawn» kompıýterlik klýbyna 15 adam jınalyp, jelide oıyn oınaǵan. Osylaısha, qamsyz júrgen jastar sanıtarlyq talaptardy elemeı, onyń saldaryn oılamaı, jaqyndaryna qaýip tóndirip otyr.
Mobıldi toptar reıd barysynda Maılın kóshesinde tún ortasynda meımandardy qabyldaǵan karaoke bardy anyqtady. Atalǵan nysanda tekserý kelgende 30-dan astam adam demalyp otyrǵan. Eń soraqysy bul nysan karantın talaptaryn osyǵan deıin de birneshe ret buzǵan jáne jaýapqa tartylǵan.
Zań buzýshylarǵa qatysty jınalǵan materıal oıyn-saýyq mekemesiniń qyzmetin toqtata turý týraly máseleni qarastyra otyryp, ákimshilik jaýapqa tartý úshin taýarlar men qyzmetterdiń sapasy men qaýipsizdigin baqylaý basqarmasyna jiberildi.
Nur-Sultan qalasynyń Polıtsııa departamenti karantındi buzǵany úshin jaýapkershilik qarastyrylǵany týraly eskertedi jáne elorda turǵyndaryn sanıtarlyq normalar men áleýmettik qashyqtyqty saqtaýǵa shaqyrady.
Aldaǵy demalys kúnderi mobıldi toptar kúsheıtilgen rejımde karantın sharalaryn buzǵandardy anyqtaý maqsatynda reıd ótkizbek.
