Elordada karantın talaptaryn buzǵan 6 mekeme jaýapqa tartyldy

NUR-SULTAN. QazAqparat - Elordanyń monıtorıngtik toptary krantın talaptaryn buzǵan kásipkerlik nysandaryn kún saıyn anyqtaı otyryp, táýlik boıy kúsheıtilgen rejımde jumys isteýde. Kóbine qoǵamdyq tamaqtandyrý oryndary ákimshilik jaýapkershilikke tartylady. Olar belgilengen jumys ýaqytyn, maska rejımin saqtamaıdy, al kelýshiler sany ruqsat etilgennen asyp jatady, dep habarlaıdy Nur-Sultan ákimdiginiń resmı saıty.

Ótken táýlikte, ıaǵnı 21 shilde kúni elordanyń 6 kásipkerlik nysanynda karantın talaptary buzyldy.

Baıqońyr aýdanyndaǵy «Seka food» kafesi men «1001 tún» restobary belgilengen ýaqyttan artyq jumys istedi.

Sondaı-aq, jumys rejımin Almaty aýdanynda ornalasqan «Janymsoul» karaoke-klýby, «Panaehalı» bary jáne «Chim chi» kafesi buzdy.

Ýaqytsha shekteýler qoıylǵanyna qaramastan Esil aýdanyndaǵy «Tequila» laýndj-bary kelýshilerdi qabyldady.

Monıtorıngtik toptar esigin jaýyp alyp jumys istegen «Quartert» karaoke-klýbyna, «Mıata» laýndj-baryna jáne «Alanya» karaoke-meıramhanasyna kire alǵan joq.

Tártip buzýshylarǵa qatysty materıaldar tıisti sharalar qabyldaý úshin aýdandyq sanıtarlyq-epıdemıologııalyq baqylaý basqarmalaryna berildi.

Esterińizge sala keteıik, qaladaǵy epıdemıologııalyq jaǵdaı áli de turaqsyz. Kún saıyn KVI aýrýynyń myńnan astam jańa jaǵdaıy anyqtalyp jatyr. Osyǵan baılanysty elorda turǵyndary men qonaqtary, sol sııaqty kásipkerlik nysandary sanıtarlyq normalar men shekteý sharalaryn qatań saqtaýy tıis.