Elordada karantın sharalaryn elemeý faktileri tirkelip jatyr

NUR-SULTAN. QazAqparat – Elordada karantındik talaptardy elemeı júrgender kóptep kezdesýde. Bul týraly Nur-Sultan qalasynyń bas sanıtarlyq dárigeri Janna Pirálıeva málim etti, dep habarlaıdy QazAqparat tilshisi.

«Shekteý jáne karantındik sharalardy saqtaý boıynsha túsindirý profılaktıkalyq jumystarynyń júrgizilýine qaramastan, kásipkerlik sýbektileri men jeke tulǵalar maskalyq rejımdi, obektilerdiń jumys rejımin buzýdy jalǵastyrýda. Áleýmettik qashyqtyqty saqtamaıdy, antıseptıkterdi paıdalanbaıdy, sondaı-aq buqaralyq ári otbasylyq is-sharalardy ótkizýge tyıym salynǵanyna qaramastan, toı, keshter jáne basqa da jıyndar ótkizedi», - dedi J. Pirálıeva onlaın rejımde ótken koronavırýstyq ınfektsııanyń aldyn alý sharalary boıynsha baspasóz máslıhatynda.

Onyń aıtýynsha, qalada koronavırýstyq ınfektsııanyń taralýyn boldyrmaýǵa baǵyttalǵan Nur-Sultan qalasynyń bas sanıtarlyq dárigeriniń qaýlylarynda kórsetilgen sanıtarııalyq epıdemııaǵa qarsy sharalardy nysandarda oryndaý boıynsha monıtorıng jalǵasýda.

«2020 jylǵy 5 shilde men 4 qarasha aralyǵynda Nur-Sultan qalasynda jumys istep turǵan 9 mobıldi toppen barlyǵy 4 462 nysan qamtyldy. Onyń ishinde tamaqtaný nysandary - 1 500, kommýnaldyq obektiler – 510, balabaqshalar – 53, mektepter – 130, bilim berý ortalyǵy - 10, densaýlyq saqtaý nysandary – 52, saýda nysandary (dúkender, bazarlar, saýda ortalyqtary, saýda úıleri) – 1 515, ónerkásiptik nysandar – 5, óndiristik nysandar - 79, áleýmettik nysandar – 3, oıyn-saýyq oryndary – 35, sondaı-aq bılıard, loto klýby, ınternet klýby jáne basqalary- 570», - dedi Janna Pirálıeva.

Budan buryn habarlanǵandaı, Janna Pirálıeva qaladaǵy epıdemıologııalyq ahýal jaıynda baıandady.

Polıtsııa departamentiniń málimetinshe, elorda meıramhanalarynda otbasylyq is-sharalar ótkizý toqtamaı tur.