Elordada karantın rejımin buzýdyń 54 faktisi anyqtaldy
NUR-SULTAN. QazAqparat - Ótken demalys kúnderi elorda polıtsııasy karantın rejımin buzýdyń 54 faktisin anyqtady, dep habarlaıdy QazAqparat tilshisi.
«Elorda turǵyndary karantın rejıminiń shekteý sharalaryn elemeı, qoldanystaǵy tyıymdarǵa qaramastan kóńil kóterý oryndarynda saýyq keshterin ótkizýde. Sol arqyly qala turǵyndaryna qaýip tóndirip otyr. Polıtsııa qyzmetkerleri monıtorıng toptyń quramynda shekteý sharalaryn buzýshylardy anyqtaýǵa arnalǵan reıdtik sharalar ótkizip jatyr. Máselen, qoldanystaǵy qaýlyda koronavırýs ınfektsııasy taralýynyń aldyn alýǵa baǵyttalǵan birqatar shara bolǵandyǵyna qaramastan «Adagio» laýndj-barynda 60-tan astam kelýshi bolǵan. Klıentter ústelderde áleýmettik araqashyqtyqty saqtamaı otyrǵan», - delingen Nur-Sultan qalalyq polıtsııa departamenti taratqan aqparatta.
Sondaı-aq «Baqsha» meıramhanasynda da 30-dan astam adam kóńil kótergen. Meıramhana belgilengen jumys kestesin jáne sanıtarlyq-epıdemıologııalyq normalardy buzǵan. Atalǵan kóńil kóterý oryndaryna qatysty materıal jınalyp, Taýarlar men kórsetiletin qyzmetterdiń sapasyn jáne qaýipsizdigin baqylaý basqarmasyna olardy ákimshilik jaýapkershilikke tartý úshin jiberildi.
Jalpy, demalys kúnderi mobıldi top 546 kásipkerlik sýbektisin tekserip, karantın rejımin buzýdyń 54 faktisin anyqtady.
«Nur-Sultan qalalyq polıtsııa departamenti mekeme ıeleri men kelýshiler tarapynan oryn alyp otyrǵan nemquraılylyq ınfektsııanyń taralýyna alyp keletindigin eskertedi. Karantın rejımin buzýshylar qoldanystaǵy zańnamaǵa sáıkes jaýapkershilikke tartylady», - dep eskertedi vedomstvodan.
