Elordada karantın rejımin buzý faktileri áli de tirkelýde

NUR-SULTAN. QazAqparat – Elordanyń mobıldik toptary táýlik ishinde 60-qa jýyq kásipkerlik nysanyn tekserip, karantın rejımin buzýdyń 5 faktisin anyqtaǵan, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Bas sanıtarlyq dárigerdiń koronavırýs ınfektsııasynyń taralýyna qarsy birqatar aldyn alý sharalary kórsetilgen Qaýlysyna qaramastan, qoǵamdyq tamaqtaný jáne oıyn-saýyq mekemeleri nysandarynyń ákimshileri men ıeleri tarapynan zańbuzýshylyqtar tirkeldi.

Osylaısha, túngi saǵat 01:33-da Qosshyǵululy kóshesindegi «Ajax» kompıýter klýbynda jeli oıyndaryna qumar 10-nan astam adam jınalǵan. Jas azamattar bos ýaqytyn alańsyz ótkizip, sanıtarlyq talaptardy saqtamaǵan.

Qaladaǵy «Baıqońyr» aýdanynyń polıtseıleri, ákimdik ókilderinen quralǵan mobıldik toptary reıd barysynda Baraev kóshesindegi «Panaehalı» baryn anyqtady. Atalmyn nysan túngi ýaqytta jumys istegen. Mekeme ishinde 30-dan astam adam júrgen. Bul bar buǵan deıin karantın talaptaryn buzǵany úshin birneshe ret jaýapqa tartylǵan.

Tártip buzýshylarǵa qatysty jınalǵan materıal ákimshilik jaýapqa tartý jáne kóńil kóterý mekemesiniń qyzmetin toqtatý úshin tıisti organǵa jiberildi.

Nur-Sultan qalasynyń Polıtsııa departamenti karantın talaptaryn buzǵandardyń jaýapqa tartylatynyn eskertip, elorda turǵyndaryn sanıtarlyq normalar men áleýmettik qashyqtyqty saqtaýǵa shaqyrady.