Elordada karantın rejımin buzǵan oıyn-saýyq oryndary anyqtaldy
NUR-SULTAN. QazAqparat - Karantın jáne shekteý sharalarynyń saqtalýyn baqylaıtyn mobıldi toptar elordanyń birqatar oıyn-saýyq oryndarynda jumys rejıminiń buzylýyn anyqtady, dep habarlaıdy QazAqparat qala ákimdiginiń resmı saıtyna silteme jasap.
«18 jeltoqsanda monıtorıng toby keshki aralaý kezinde Esil aýdanynyń polıtsııa basqarmasy qyzmetkerlerimen birge ShOB nysandarynda karantın rejıminiń saqtalýyn tekserdi: «Bla Bla» bar, Turan dańǵyly, 24; «Zoloto» meıramhanasy, Turan dańǵyly 21; «Dark Side» bary Máńgilik d-ly, 52a; «Icon» klýby, Turan dańǵyly, 21; «Tequila» laýndj bary, Jekebatyr k-si, 49; «Aura club ALANYA» túngi klýby, Turan dańǵyly, 2. Bul nysandardyń barlyǵy jumys kestesin buzǵan», - dep habarlady Esil aýdanynyń ákimdigi.
Anyqtalǵan buzýshylyqtar boıynsha jedel habarlamalar jasaldy, kásipkerlerden túsindirme alyndy.
Búgingi tańda birqatar túngi klýbtar men meıramhanalarǵa qatysty buıryqty oryndamaǵany úshin Nur-Sultan qalasynyń mamandandyrylǵan aýdanaralyq ákimshilik sotyna 7 ákimshilik hattama jiberildi. Olar «SOVA» karaoke-bary, «Janym Sol» karaoke-bary, «Alanya» túngi klýby, «Teqila» laýndj-bary, «Echo» bary, «Zoloto» meıramhanasy.
«Sanıtarlyq epıdemıologııalyq qadaǵalaý basqarmasy ókilderi sottan joǵaryda atalǵan nysandar qyzmetin 3 aıǵa deıin toqtata turý túrindegi qosymsha jazany qoldaný týraly ótinim jiberedi», - dep atap ótti sanıtarlyq-epıdemıologııalyq qadaǵalaý basqarmasy.
Aıta ketý kerek, elordada mereke kúnderi qaýipsizdikti qamtamasyz etý úshin kóshede jáne kópqabatty úılerdiń aýlalarynda, ásirese oıyn-saýyq mekemeleriniń aýmaǵynda jáne basqa da azamattardyń jappaı demalatyn oryndarynda patrýlder uıymdastyrylǵan.
