Elordada karantın rejimin buzǵan 421 adam polıtsııaǵa jetkizildi
NUR-SULTAN. QazAqparat – Elordada blok beketterden kirip-shyǵý boıynsha erekshe rejimdi buzǵan 99 adam jazaǵa tartylyp, onyń 84-i qamaýǵa alyndy, dep habarlaıdy QazAqparat qala ákimdigine silteme jasap.
«30 naýryzdan beri elordada tótenshe jaǵdaı kúsheıtildi. Nur-Sultan qalasynyń polıtsııa basqarmasy koronavırýs ınfektsııasynyń taralýyn aldyn alý boıynsha barlyq qajetti sharalardy qoldanýda. Polıtsııa jasaqtary kóbeıtildi. Qalanyń barlyq aýdandaryndaǵy azamattar men kólik qozǵalysy qatań qadaǵalanýda.Táýlik boıy kúzet júrgizilip, jedel toptar, jaıaý jasaqtar qadaǵalaýda. Blok beketterdegi ahýal áýeden dron arqyly baqylanýda»,- dep málimdedi departament mamandary.
28-31 naýryz aralyǵy qalalyq PB aýmaqtyq bólimshelerine 421 adam jetkizilgen. 31 naýryzdaǵy aqparat boıynsha, tótenshe jaǵdaı rejimin buzǵany úshin 434 azamat ákimshilik jaýapkershilikke tartyldy. Onyń 90-y qamaýǵa alyndy, 221-ine aıyppul salyndy,103 adamǵa eskertý jasalyp, 20 is sottyń qaraýyna jiberildi.
Blok beketterden kirip-shyǵý boıynsha erekshe rejimdi buzǵany úshin 99 azamat jazaǵa tartyldy. Onyń 84-i qamaýǵa alyndy,14-ine 10 AEK kóleminde aıyppul salyndy, 1 is sottyń qaraýyna jiberildi.
TJ kezinde mas kúıinde kólik júrgizgeni úshin 1 azamat qamaýǵa alynyp, oǵan 40 AEK kóleminde aıyppul salyndy.
Kásipkerlik qyzmet nysandary boıynsha, 130 azamat jaýapkershilikke tartyldy. Onyń 5-eýi qamaýǵa alynyp, 110-yna aıympul taǵaıyndaldy,15 is sotqa joldandy.
Esterińizge salsaq, 28 naýryzdan beri elordada úıden shyǵýǵa tyıym salyndy. Tek azyq- túlik alý úshin dúkenge, dári alý úshin dárihanaǵa jáne em alý úshin medıtsınalyq mekemege barýǵa, sondaı-aq qyzmeti ruqsat etilgen jaǵdaıda jumysqa shyǵýǵa ruqsat etilgen.
Sonymen birge, kámelettik jasqa tolmaǵandarǵa eresekterdiń ertýinsiz qalada júrýge shekteý qoıyldy, sondaı-aq kóshelerde otbasy múshelerin qospaǵanda úsh adamnan artyq jınalýǵa tyıym salyndy.
