Elordada karantın rejimin buzǵan 300-den astam adam jaýapqa tartyldy
NUR-SULTAN. QazAqparat – Elordada karantın rejimin buzǵan 300-den astam adam jaýapqa tartyldy. Bul týraly Nur-Sultan qalasy Polıtsııa departamentiniń basshysy Erjan Sádenov málim etti, dep habarlaıdy QazAqparat tilshisi.
«Karantın rejiminiń kúsheıtilýine qaramastan, keıbir azamattar qoǵamdyq tártipti buzyp, kóshede júrgen. Úsh kúnniń ishinde, ıaǵnı 28-30 naýryz kezeńinde polıtsııaǵa 307 adam jetkizildi. Olarǵa qatysty ákimshilik jaza qabyldandy. Sonymen qatar, eki myńnan astam profılaktıkalyq túsindirý sharalary júrgizildi», - dedi E. Sádenov «Habar 24» telearnasynda ótken onlaın brıfıngide.
Onyń sózine qaraǵanda, 22 naýryzdan bastap tótenshe jaǵdaı rejimin buzǵany úshin 369 adam ákimshilik jaýapkershilikke tartyldy, onyń ishinde 86-sy qamaýǵa alyndy, 202 adamǵa aıyppul salyndy. Sonymen qatar, 69 adamǵa eskertý jasalsa, 17 is sotta qaralýda.
«Blok-beketterinde 98 adam jazaǵa tartyldy, onyń ishinde 80 adam qamaldy, 14 adamǵa aıyppul salyndy, 4 is sotta qaralýda», - dedi E. Sádenov.
