Elordada karantın rejimin buzǵan 116 kásipker jazalandy
NUR-SULTAN. QazAqparat – Elordada karantın rejimi kezeńinde 100-den astam kásipker jaýapqa tartyldy. Bul týraly Nur-Sultan qalasy Polıtsııa departamentiniń basshysy Erjan Sádenov málim etti, dep habarlaıdy QazAqparat tilshisi.
«Karantın rejimin buzǵany úshin 116 kásipker jazaǵa tartyldy. Onyń ishinde beseýi qamaýǵa alynsa, 102 adamǵa aıyppul salyndy. Qazirgi ýaqytta 9 is sotta qaralýda», - dedi E. Sádenov Habar 24 telearnasynda ótken onlaın brıfıngide.
Budan buryn habarlanǵandaı, elordada karantın rejimin buzǵan 300-den astam adam jaýapkershilikke tartyldy.
Sonymen qatar, qalada 30 avtokólik arnaıy aıyp turaǵyna qoıyldy.
Aıta keteıik, QR Ádilet mınıstri Marat Beketaev karantın kezinde kóshege sportpen shuǵyldanýǵa shyǵatyndarǵa qatysty túsinik berdi.
«Osy turǵyda densaýlyq saqtaý mamandarynyń pikirine súıenemiz. Mamandardyń paıymynsha, (ınfektsııa qaýpi kezinde) sportpen shuǵyldanatyn adamǵa da, sondaı-aq onyń janyndaǵy adamdarǵa da joǵary qater týyndaıdy. Sondyqtan sportpen aınalysýdy kóshege shyǵý úshin negiz retinde sanamaý sheshimi qabyldandy. Ǵımarattyń ishinde sportpen shuǵyldaný úshin túrli ádister bar. Osy oraıda bul tásilderdi ýaqytsha paıdalanyp, engizilgen shekteýlerge túsinikpen qaraǵan jón bolar», - dedi Marat Beketaev.
