Elordada karantın rejımin buzǵan 11 mekeme ákimshilik jaýapkershilikke tartyldy

NUR-SULTAN. QazAqparat – Elordada 11 mekeme karantın rejımin buzǵany úshin ákimshilik jaýapkershilikke tartyldy, dep habarlaıdy QazAqparat qala ákimdigine silteme jasap.

Qalanyń monıtorıng toptary birneshe aı boıy kúsheıtilgen rejımde jumys istep keledi. Olar kún saıyn qaladaǵy 100-den astam kásipkerlik nysany arasynda karantın talaptaryn buzǵandardy anyqtaıdy.

5 tamyzda monıtorıng toptary 11 mekemeni ákimshilik jaýapkershilikke tartty.

Almaty aýdanynda «Prajechka» grıl bary, «Rezident spa» spa ortalyǵy jáne «Comeback» oıyn klýby karantın rejımin buza otyryp jumys istedi.

Dál osyndaı buzýshylyqtar Baıqońyr aýdanyndaǵy «Fakir» dámhanasy men «Pravyı» laýndj barynda da boldy.

Saryarqa aýdanynda «Kóktal park» dámhanasy «Cofee Boom» 2 kofehanasy monıtorıng toptarynyń tekserisinen ótken joq. Mekemelerde karantın jáne betperde rejımi saqtalmaǵan.

Esil aýdanynyń «Mıata Lounge» qyzmetin kórsetý ornynda, «Alif» kafesinde jáne «Chechil Pub» barynda jumys rejımin buzý, jazǵy oryndardyń jumys isteýi, kelýshiler men ákimshiliktiń maska rejımin buzýy, sondaı-aq áleýmettik qashyqtyń saqtalmaýy anyqtaldy.

Tártip buzýshylarǵa qatysty jınalǵan materıaldar ákimshilik sıpattaǵy sharalar qabyldaý úshin sanıtarııa-epıdemıologııa baqylaýy salasyndaǵy ýákiletti organǵa berildi.