Elordada karantın rejımi jalǵasýda
Nur-Sultan qalalyq sanıtarlyq-epıdemıologııalyq baqylaý departamentiniń málimetinshe, tek sońǵy táýlikte 4 874 jaǵdaı tirkelgen. Onyń ishinde 1 074 jaǵdaı - sımptomdy, 3 800-i - sımptomsyz. Qańtar aıynyń basynan beri barlyǵy 44 923 jaǵdaı tirkeldi. Bul 2021 jylǵy jeltoqsanda tirkelgen 2 737 jaǵdaıdan 16 ese joǵary.
«Elordadaǵy COVID-19 boıynsha qolaısyz epıdemıologııalyq ahýal qala turǵyndarynyń maska rejımin, áleýmettik qashyqtyqty saqtamaýymen, vaktsınatsııany eskermeýimen jáne qala aýmaǵynda «Omıkron« kontagıozdy shtamynyń tez taralýymen baılanysty bolyp otyr. Jańa shtamm - Omıkronnyń taralý koeffıtsıenti 1:5, ıaǵnı Delta nusqasynan 70 ese jyldam taralady. Táýligine eń joǵarǵy aýrýshańdyq kórsetkishi 15 qańtarda oryn alyp, 5 826 jaǵdaı tirkeldi. Bul búkil pandemııa kezeńindegi rekordtyq kórsetkish.
»Omıkron« shtamynyń anyqtalýyn jáne qaladaǵy qolaısyz epıdemıologııalyq ahýaldy eskere otyryp, 12 qańtardan bastap elordanyń bas sanıtarlyq dárigeriniń shekteý jáne karantın sharalaryn qatańdatý týraly qaýlysy qabyldandy. Ashyq jobasyna qatysatyn obektilerde 30 adamǵa deıin eske alý sharalaryn qospaǵanda, buqaralyq is - sharalardy ashyq aýada da, úı ishinde de, otbasylyq, estelik is-sharalardy qosa alǵanda, onyń ishinde úıde ótkizýge tyıym salynady. Ashyq jobasyna qatysqanyna qaramastan, kontsert zaldarynyń, fılarmonııalardyń, teatrlardyń, tsırkterdiń, kınoteatrlardyń, túngi klýbtar men karaoke barlarynyń qyzmetine tyıym salynady. Juma namazy jáne dinı rásimder sııaqty ujymdyq is-sharalarǵa tyıym salynady. Sonymen qatar, konferentsııalar, semınarlar, kórmeler, forýmdar ótkizýge tyıym salynady. Aıta keteıik, bul sharalar qala turǵyndary arasynda koronavırýstyq ınfektsııanyń taralý jáne juqtyrý qaýpin boldyrmaý úshin qabyldandy.
Sonymen qatar, elordanyń aýdandyq ákimdikteri tusynda12 monıtorıngtik top jumysyn jalǵastyrýda, olardyń qyzmeti shekteý jáne karantın sharalaryn buzýǵa jol bermeýge baǵyttalǵan. Aǵymdaǵy jyly kásipkerlik obektilerinde monıtorıngtik toptar anyqtaǵan shekteý jáne karantın sharalaryn buzýshylyqtar boıynsha materıaldar túsýde.
Aıta ketý kerek, elordada tótenshe jaǵdaı rejıminiń alyp tastalýy, karantındik rejımniń aıaqtalýyn bildirmeıdi. Qalada shekteý sharalary áli de jalǵasýda. Jańa vırýstyń taralý qaýpi áli de joǵary.
«Osyǵan baılanysty, sanıtarlyq-epıdemıologııalyq baqylaý departamenti elorda turǵyndary men qonaqtaryn, sondaı-aq kásipkerlik sýbektilerin koronavırýstyq ınfektsııanyń odan ári taralýyn jáne lokdaýnnyń engizilýin boldyrmaý úshin sanıtarlyq erejeler men karantın talaptaryn qatań saqtaýǵa shaqyrady. Halyqtyń kóp bóligi vaktsınatsııa men revaktsııanatsııa qabyldamaı, pandemııa aıaqtalmaıtynyn túsinýimiz kerek. Aıaqtalǵan ımmýnızatsııa ǵana bizdi qalypty ómirimizge oralýǵa múmkindik beredi», - dep atap ótedi departamentten.
