Elordada karantın bastalǵaly 792 avtokólik aıyp turaǵyna jiberildi
NUR-SULTAN. QazAqparat – El astanasynda karantın rejımi uzartyldy. Nur-Sultan qalalyq jol polıtsııasy qala turǵyndaryna karantın rejımin saqtaý kerektigin eskertedi.
Kez-kelgen quqyqbuzýshylyq úshin jaýapkershilik qarastyrylǵan. Azamattarǵa jaqyn mańdaǵy azyq-túlik dúkeni, dárihanaǵa barýǵa, medıtsınalyq qyzmet alý men ruqsat etilgen jumysqa barýǵa bolady. Basqadaı jaǵdaıda úıden shyǵýǵa tyıym salynǵan, dep habarlaıdy QazAqparat PD silteme jasap.
Ótken táýlikte, ıaǵnı 15 sáýirde 139 azamat ákimshilik jaýapqa tartyldy, olardyń úsheýi tutqyndalyp, 85-ne aıyppul salyndy, 32 azamatqa eskertý jasalsa, 19 is sot qaraýynda jatyr.
Ártúrli ákimshilik jaýapqa tartylǵan 106 avtokólik kommýnaldyq turaqqa jiberildi. Karantın rejımi bastalǵaly bul san 792-ge jetti.
Jalpy karantın bastalǵaly 2 myńnan astam adam ákimshilik jaýapqa tartyldy, olardyń 183-i qamaýǵa alynyp, 1330 azamatqa aıyppul salyndy, 472 eskertý jasalyp, 65 materıal sottyń qaraýynda jatyr.
Qala aýmaǵy kóshelerdiń shekarasy arqyly sharshy alańdarǵa bólingen. Árqaısysynda tártip saqshylary jaǵdaıdy baqylap tur. Qalada 26 mobıldik post ornatylǵan.
«Polıtsııa qyzmetshileri engizilgen shşekteýlerge baılanysty turǵyndar arasynda túsindirý jumystaryn júrgizip jatyr. Tótenshe jaǵdaı rejımin buzǵan adamdar zańǵa sáıkes jazalanady», - delingen PD habarlamasynda.
Birneshe ret eskertý jasalyp, turǵyndarmen aldyn ala túsindirý jumystary júrgizilip jatqanyna qaramastan kópshilik bul talapqa selqos qaraıdy.
«Qurmetti qala turǵyndary, turǵyndardyń qaýipsizdigin qamtamasyz etý maqsatynda karantın rejimin saqtaýdy talap etemiz. Ótkizilip jatqan sharalarǵa túsinistikpen qarap, polıtsııa qyzmetshileriniń zańdy talaptaryn oryndap, ınfektsııanyń aldyn alýda olarǵa qoldaý kórsetýlerińizdi suraımyz. Barlyq sharalar sizdiń jáne jaqyndaryńyzdyń densaýlyǵy úshin qolǵa alyndy», - dep atap ótti polıtsııa ókili.
