Elordada karantın aýmaǵy qala syrtyndaǵy eldi mekender shekarasyna deıin keńeıtildi
NUR-SULTAN. QazAqparat – Elordada karantın aýmaǵy qala syrtyndaǵy eldi mekender shekarasyna deıin keńeıtildi. Bul týraly Ortalyq kommýnıkatsııalar qyzmetiniń alańynda ótken Nur-Sultan qalasynda koronavırýstyń taralýyn boldyrmaý jáne ınfektsııa boıynsha aǵymdaǵy jaǵdaıǵa arnalǵan baspasóz konferentsııasynda aıtyldy, dep habarlaıdy QazAqparat tilshisi.
«Elimizde tótenshe jaǵdaıdyń engizilýine oraı Memleket basshysynyń tapsyrmasyna sáıkes jáne qalyptasqan kúrdeli ahýalǵa baılanysty, sondaı-aq halyqty barynsha habardar etý maqsatynda qosymsha shekteýler men profılaktıkalyq jáne antıepıdemııalyq sharalar qabyldanýda. QR Prezıdenti janyndaǵy Tótenshe jaǵdaıdy qamtamasyz etý jónindegi memlekettik komıssııa qazirgi tańda úkimet tarapynan osy jumystardy atqaryp jatyr. Tapsyrmaǵa sáıkes 19 naýryz kúni saǵat 00:00-den bastap Nur-Sultan qalasynda koronavırýstyń taralý qaýpine baılanysty karantın rejimi engizildi. Qala perımetri boıynsha turǵyndardyń qozǵalysy men kólikterdiń kirip-shyǵýyn shekteý úshin qala sheńberinde 6 blok beket ornatyldy, qosymsha Aqmola oblysyna taǵy 1 blok beket ornatyldy. Sonymen qala boıynsha 7 blok beket ornatyldy», - deıdi Nur-Sultan qalasy ákiminiń orynbasary Baqtııar Máken.
Onyń aıtýynsha, QR Qorǵanys mınıstrliginiń tıisti mamandyq qyzmetkerleri men sanıtarlyq-epıdemıologııalyq qyzmetiniń ókilderi, ishki ister mamandary blok beketterde tıisti jumystaryn istep jatyr.
«Qala basshylyǵy Qaraótkel, Talapker, Qoıandy, Qosshy, Jibek joly, Shubar aýyl turǵyndarynyń qozǵalys máselesin retteıdi. Bul eldi meken turǵyndarynyń qala sheńberinde qozǵalys erejeleri men qala turǵyndarymen teńdeı sanıtarlyq-epıdemııalyq talaptarǵa saı karantın aýmaǵy qala syrtyndaǵy eldi mekender shekarasyna deıin keńeıtildi. Blok beketter osy aýyldardyń syrtyna ornalastyryldy», - deıdi ol.
