Elordada qaraqshylar JShS jumysshylaryna shabýyl jasap, 3 mln teńgeni alyp ketken
NUR-SULTAN. QazAqparat – Qaraqshylar Nur-Sultandaǵy JShS-nyń biriniń jumysshylaryna shabýyl jasap, 3 mıllıon teńge kólemindegi qarajatty urlap ketken, dep habarlaıdy QazAqparat elordalyq Polıtsııa departamentiniń baspasóz qyzmetine silteme jasap.
«Esil» aýdany polıtsııa basqarmasyna JShS menedjeri Máńgilik el kóshesinde ózine belgisiz bireýler shabýyl jasap, 3 mln teńge kólemindegi qarajatyn urlap ketkenin habarlady. Jábirlenýshiniń aıtýynsha, saǵat 20:00 shamasynda ol JShS býhgalterimen birge bankomattan 10 mln 900 myń teńgeni qolma-qol aqshaǵa aınaldyrǵan. Termınaldar ornalasqan ǵımarattan shyǵyp, olar avtokólikke qaraı bet alǵan. Osy ýaqytta 4 jigit menedjerge shabýyl jasap, aqsha salynǵan paketin tartyp almaqqa árekettenip ony ura bastaǵan. Tóbeles kezinde shabýyldaýshylar gaz ballonyn qoldanyp, 3 mln teńgeni tartyp alǵan da rýlde sybaılasy otyrǵan kólikke minip, izderin sýytqan», - dedi vedomstvonyń baspasóz qyzmetinde.
Jedel-izdestirý is-sharalaryn júrgizý barysynda polıtsııa 18-den 23 jasqa deıingi qaraqshylyq shabýylǵa kúdikti jeti jigitti ustady. Qazirgi ýaqytta atalǵan fakti boıynsha QR QK192-baby, 4-tarmaǵyna (Qaraqshylyq) sáıkes sotqa deıingi tergeý amaldary júrgizilýde. Qylmystyq is boıynsha aıyptalýshylardyń barlyǵy PD ýaqytsha ustaý ızolıatoryna qamaldy.
Kúdiktiler tonalǵan qarajattyń bir bóligin jumsap úlgergen, qalǵan bóligin - 700 myń teńgeni polıtsııa tárkiledi. Qylmystyq isti tergeý kezinde JShS qyzmetkerleriniń qylmysqa qatysy bar-joǵy tekseriledi.
