Elordada qar tazalaý jumystaryna 2400 jumysshy shyqty

ASTANA. KAZINFORM —  Astanada qar tazalaý jumystaryna 1,2 myńnan asa arnaıy tehnıka men 2400 jol jumysshysy shyqty, dep habarlaıdy Astana ákimdiginiń resmı saıty.

Elordada túni boıy jaýyn-shashyn kóp jaýdy. Qalanyń kommýnaldyq qyzmetteri birneshe aýysymda táýlik boıy kúsheıtilgen rejımde úzdiksiz jumys júrgizip jatyr.

Búgin qar tazalaýǵa 1200-den asa arnaıy tehnıka men 2400-den asa jol jumysshysy jumyldyrylǵan.

9-ynan 10 qarashaǵa qaraǵan qaladan 2400 tekshe metr qar shyǵaryldy, bul — 188 aýyr júk reısi.

Eń aldymen, erejelerge sáıkes, joldarda keptelis bolmas úshin óte qarqyndy qozǵalys aımaqtary tazartylady. Sondaı-aq ortasha qarqyndylyǵy bar ýchaskeler-alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. oryndar qardan tazartylady.

Qalada birneshe jabdyqtalǵan qar polıgondary bar. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylǵan, jaryqtandyrý qosylǵan.

— Aýa raıynyń qolaısyzdyǵyna baılanysty Astana ákimdigi qala turǵyndary men qonaqtarynan jazataıym oqıǵalardy boldyrmaý úshin kóshede júrgende óte muqııat ári saq bolýdy suraıdy, — delingen ákimdik habarlamasynda.

Buǵan deıin habarlaǵanymyzdaı, Astanada qala mańyna qatynaıtyn eki avtobýs ýaqytsha toqtady.