Elordada qar kúreý jumysyna myńnan astam arnaıy tehnıka jumyldyryldy
ASTANA. KAZINFORM – Astananyń kommýnaldyq qyzmetteri táýlik boıy qar kúreý jumysyn júrgizýdi jalǵastyryp jatyr. Kún saıyn qaladan ondaǵan myń tekshe metr qar shyǵarylyp otyr, dep habarlaıdy qala ákimdiginiń resmı saıty.
Ótken túnde qaladan arnaıy polıgondarǵa 935 reıspen 13 myńnan astam tekshe metr qar shyǵaryldy.
27 qańtar kúni tańerteńgi saǵattan bastap qar tazalaý jumysyna 3 113 jol jumysshysy men 1 083 birlik arnaıy tehnıka qatysty.
Qys maýsymy bastalǵannan beri qaladan qar polıgonyna 232 567 reıspen 3 231 171 tekshe metr qar shyǵaryldy.
Eń aldymen negizgi kósheler men qoǵamdyq kólik júretin baǵyttar tazartylyp jatyr. Odan keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda tazalaý jumysy júrgiziledi.
Qala turǵyndarynyń qaýipsiz qozǵalysyn qamtamasyz etý úshin joldar, trotýarlar men kóshelerge tehnıkalyq tuz sebilýde. Bul jumystar da táýlik boıy atqarylady.
Sonymen qatar aýla aýmaqtaryndaǵy tazalyqty qamtamasyz etý páter ıeleri kooperatıvteri (PIK) men múlik ıeleri birlestikterine (MIB) júktelgen. Olar turǵyndardyń qaýipsizdigi men qolaılylyǵy úshin aýlalardy qar men kóktaıǵaqtan ýaqtyly tazalaýy tıis.
Astana qalasynyń ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy jaǵdaıynda alys jolǵa shyqpaýǵa shaqyrady.
Buǵan deıin habarlaǵanymyzdaı, Oraldaǵy qar synamalaryna júrgizilgen hımııalyq taldaý nátıjeleri jarııalandy.