Elordada qar kúreý jumysyna 3 myńnan asa jol jumysshysy jumyldyryldy
ASTANA. KAZINFORM – Astananyń kommýnaldyq qyzmeti alǵash qar jaýǵan kúnnen bastap, toqtaýsyz, kúni-túni jumys istep keledi, dep habarlaıdy Astana ákimdiginiń resmı saıty.
Ótken túnde elordadan qar polıgondaryna 2 098 aýyr júk kóliginiń reısi arqyly 35 530 tekshe metr qar shyǵaryldy. 6 naýryz kúni tańerteń qalany qar men kóktaıǵaqtan tazartýǵa shamamen 1 720 arnaıy tehnıka men 3 035 jol jumysshysy tartyldy.
Aldymen negizgi kósheler men qoǵamdyq kólik joldary tazalanady. Odan keıin qozǵalys qarqyny ortasha ýchaskelerde – aýlalarda, alańdarda, trotýarlar men aıaldamalarda tazalyq júrgiziledi.
Qys mezgili bastalǵaly beri qar polıgondaryna 444 269 reıspen 6 mln 674 myń 203 tekshe metr qar shyǵaryldy. Qala turǵyndarynyń qaýipsiz qozǵalysyn qamtamasyz etý úshin joldar, trotýarlar men kóshelerge tehnıkalyq tuz sebilýde. Bul jumystar da táýlik boıy atqarylyp jatyr.
Eske sala keteıik, buǵan deıin Qazavtojol júrgizýshilerge aýa raıyna baılanysty eskertý jasaǵanyn habarlaǵanbyz.