Elordada qar aralas jańbyr jaýyp, naızaǵaı oınaıdy
NUR-SULTAN. QazAqparat - Nur-Sultan qalalyq Tótenshe jaǵdaılar departamenti erteń elordada aýa raıy kúrt qubylatynyn habarlady.
Qazgıdromettiń málimetinshe, 30 sáýirde kúndiz qar aralas jańbyr jaýyp, naızaǵaı oınaıdy. Kóktaıǵaq bolyp, burshaq túsýi múmkin. Soltústik-batystan jel soǵyp, onyń jyldamdyǵy 15-20 m/s-ke jetýi yqtımal. Aýa temperatýrasy kúndiz 0-2 gradýsqa deıin tómendeıdi.
Osyǵan baılanysty TJD qala turǵyndary men qonaqtarynyń nazaryna mynadaı nusqaýlyqtar usyndy:
- muqııat bolyńyz, aýa raıynyń ózgerýi týraly aqparatty jáne jarııalanǵan shekteýlerdi jiti qadaǵalańyz;
- kóshede baǵandardan, aǵashtardan, jarnamalardan, EJJ jáne symdardan alys júrýge tyrysyńyz;
- qurylys obektileri halyqty jáne aýmaqty qolaısyz aýa raıy jaǵdaılarynyń saldarynan qorǵaý týraly qosymsha sharalar qabyldasyn. Múmkindiginshe qurylys obektilerindegi qurylys-montaj jumystarynyń qyzmetin shektesin;
- avtokóligińizdi garajǵa qoıyńyz, garaj bolmaǵan jaǵdaıda aǵashtardan jáne eski qurylystardan alys qoıyńyz;
- páter men úılerde barlyq terezelerdi nyq jabyńyz;
- úı-jaılarda terezeden alshaq turyp, elektr quraldardy qoldanbaýǵa tyrysyńyz;
- avtokólik quralyn basqaryp kele jatsańyz, ony toqtatýǵa tyrysyp, turaqqa qoıyńyz. Aýa raıy saldarynan jol baǵytyn kórý nasharlap, naızaǵaı jarqyly júrgizýshi kózine shaǵylysady, osynyń saldarynan jol-kólik oqıǵasy bolýy múmkin;
- naızaǵaı kezinde sý qoımalarynda sýǵa shomylýǵa, balyq aýlaýǵa bolmaıdy.
Sondaı-aq, tótenshe jaǵdaı týyndaǵan jaǵdaıda «112» nómirine qońyraý shalýǵa bolady.
