Elordada qańtar aıynda jastarǵa 350 páter beriledi – Altaı Kólginov

NUR-SULTAN. QazAqparat – Nur-Sultan qalasynyń ákimi Altaı Kólginov bıylǵy jyldyń qańtar aıynyń ózinde jastarǵa 350 páter beriletinin málim etti, dep habarlaıdy QazAqparat.

Bul týraly ol búgin óziniń Instagram paraqshasyna jazdy.

«Turǵyn úı máselesi - bizdiń jumysymyzdaǵy mańyzdy baǵyttardyń biri. Bıyl jumys isteıtin jastarǵa arnalǵan jalǵa beriletin turǵyn úı baǵdarlamasyn jalǵastyramyz. Baǵdarlama Elbasynyń tapsyrmasyna sáıkes 2019 jyly iske qosyldy.

Qańtar aıynda jastarǵa 350 páter berýdi josparlap otyrmyz. Jyl sońyna deıin taǵy 1050 páter beriledi. Osy páterlerde turyp jatqan ýaqytta jastar aıaqqa turyp, belgili bir kapıtal jınap, óz baspanalaryn satyp ala alady. Sondaı-aq, basqa turǵyn úı baǵdarlamalary men baǵyttary boıynsha júıeli jumysty jalǵastyra beremiz»,-dep jazdy ákim.

Sondaı-aq ol Memleket basshysynyń tapsyrmasyna sáıkes ótken jyldan bastap qoljetimdi, jeńildikpen beriletin turǵyn úı qurylysynyń kólemi ulǵaıǵandyǵyn aıty.